Shillong Rymphang 23: Ka sengbhalang kaba dang shumih shen kata ka A’chik State Peoples’ Front (ASPF), ka la pynlong ïa ka jingpynsngew thuh paidbah halor ka jingdon kam ban pynlong ïa ka Tura kum ka nongbah ha ka por tlang ne ka ‘Winter Capital’.
Kane ka jingpysngew thuh paidbah la pynlong ha Chisim A’pal kaba ha North Garo Hills District, ha kane ka jingpynsngew thuh paidbah la wan ban ïa don lang da ki nongialam jong ka Garoland State Movement Committee (GSMC), kaba dei ka wei na ki kynhun ba la lamkhmat ïa kane ka jingdawa la kham slem bha.
Ha kane ka jingialang la wan ban ïa shimbynta ruh da ki rangbah shnong na kyllen kylleng ki shnong jong ka North Garo Hills District, ki nongialam niam bad ki paidbah.
Ha ba ai jingkren ha kane ka jingialang na ka liang ka General Secretary ka ASPF ka Bernita Marak ka la ong ba kane ka jingdawa ban pynlong ïa ka Tura kum ka nongbah ha ka portlang kadei kat kum ka jingiakren ka ba tangda ka ktien ïa ka ba la kular na duh ka por ki nongpynioh ïa ka jylla.
“Khlempoi pyrkhat kane ka jingkular kam pat shym la urlong tad haduh kine ki sngi ba mynta, ka ASPF ha ryngkat ka GSMC dangshen ka la ai ïa ka dorkhas sha u Myntri Rangbah ka Jylla ha ka ba ïa dei bad kane ka mat jingdawa” ka la ong.
Ka Marak ka la ong ruh ba lada pynlong ïa ka Tura kum ka Winter Capital kane kan wanrah ïa ka jingmar ïa katjuh ha ka liang ki kam pynroi ha kine thaiñ.
“Ka jingeh ha ka liang ka pisa-tyngka ban leit sha Shillong ka khanglad ïa kiba bun ki nongshong shnong ha kaban ïoh ïa ki lad jingiarap ba kongsan, kane ka dei ka jingdonkam ba kyrkieh ïa ka winter capital khnang ban weng ïa kine ki jingeh” ka la ong.
Ka la pynshai ruh ba kane ka jingpynshai paidbah kam dei pyrshah ïa ka sorkar, hynrei kadei ka jingkyrpad ban pynurlong ïa ka jingdawa bala slem bha jong ka thaiñ Garo Hills kaba pynkynmaw ruh ïa ka jingthmu jong u Myntri Rangbah ba nyngkong ka jylla u Capt. Williamson A Sangma.
Hakane ka jingialang la shim ruh ïa ka rai ban leit ban pynsngew thuh ïa kane ka mat jingdawa ban pynlong ïa ka Tura kum ka nongbah ha ka por tlang sha baroh kawei ka Garoh Hills.
