Shillong, Lber 05: Ka Ophis jong u Project Director,Meghalaya AIDS Control Society, Shillong ka kwah ban pyntip ba ki dawai ARV na ka bynta ki PLHIV kiba la heh la san bad ki ba dang khynnah khyllung ki don ha baroh ki ART Centre kiba hap hapoh kane ka ophis.
U Project Directoru la thaw ia ka Supply chain committee kaba kynthup ia ki Programme Officer na ki division bapher bapher ban peit bad pynthikna ka jingpynbiang ia baroh ki dawai ARV na ka SACS sha ki ART Centre.Ngi la trei lang bad baroh ki ART centre ha ka jylla ban pynthikna ka jingpynbiang ia baroh ki dawai ARV na ka bynta kiba la heh la san bad ia ki khyllung khynnah.
Haduh mynta ngim pat shem ia kanokano ka jingduna ki dawai ARV ha ka jylla, mynta la don lypa ki dawai ban dap haduh 2 bnai ha baroh ki ART Centre.Ngi dang trei shitom ban kyntiew ia ki rukom pynbiang ia ki jingdonkam bad ban pynthikna ba baroh ki PLHIV kiba wan sha ki centre ki ioh ia ki dawai ba ki donkam.
Ngi sngewkhia shisha halor ka jingmih khubor ha kawei na ki kotkhubor shaphang ka jingduna ki dawai HIV ha ka thain shateilammihngi kaba la mih ha ka 4 tarik u Lber 2023. Ngi kwah ban pynshaihangne ba ym shym la don kanokano ka jingduna ki dawai ARV hangne ha jylla Meghalaya.
