Shillong, Nailur 30: Ka seng JSU hadien ba shem ia u Ayush Kumar ba u lah pyndonkam da ka PRC kaba shu ioh thok na DC East Jaintia Hills ha u snem 2021 da ka ba apply lyngba ka Temporary Residential Certificate na ka shnong Thangskai u lah ioh iaka PRC ha juh u snem bad u lah apply ka state quota MBBS 2023-24 bad iakane ruh u lah ioh.
Na ka liang ka JSU ka lah iai bud dien iaka jingleh sukor jong u Ayush ka lah dawa mardor na ka sorkar ban pyndam ia u na state quota ban pule MBBS ryngkat ka jingsnoh kti ia lang bad ki nongialam shnong Thangskai .
Ka seng ka lah kynduh ia i myntri ka tnat ka koit ka khiah ia ka Kong Ampareen dang shen bad kumjuh ruh ka seng lah ai daka jingthoh sha i bad sha u IAS Cyril V Diengdoh uba dei peit ia Home and Political department ka sorkar jylla bad ka seng ka buh ruh daka shithi ujor sha u DC.
Ka jingujor ban pynshisha ba u Ayush Kumar um dei hok ban ioh iaka state quota ban pule MBBS namar u dei u bar jylla bad u kpa jong u don Aadhaar sha Bihar bad ka EPIC ruh ki don sha Bihar bad u kpa jong u Ayush kidei kiba shu sah trei ha Dalmia Cement bad ka seng ka tip shai ba une u briew um don hok ban ioh PRC namar um dei u ba shong sah hapoh ka jylla.
Ka seng ka pynpaw iaka jingsngewnguh ia shnong Thangskai kaba lah pdiang iaka jingbakla dakaba buh da ka shithi ujor pyrshah ia u Ayush bad ia u Kpa jong u ha u DC ka East Jaintia.
Kane ka jingdawa ka seng ka long kaba jop shisha hynrei ka seng ka phah iaka khubor sha baroh ki nongialam shnong ka Bri u Hynniewtrep ba ym dei satia ban ai syrnot shnong lane NOC ia ki bar jylla nangne sha khmat namar ka ktah bad shah iuhroit iaka hok jong ki trai ri trai muluk.
