Mairang, Naitung 05: U Lamphang ka Iing dorbar Thaw ain ka jylla Meghalaya, u Bah Metbah Lyngdoh hynne ka sngi u la plié ia ka ophis u District Transport Officer (DTO) bad Secretary, Regional Transport Authority, Eastern West Khasi Hills District, Mairang ha Lumsohkhlur, Mairang ha ka jingdon ryngkat u myntri ka tnat Transport ka jylla, u Bah Dasakhiat Lamare, u myntri ka tnat Water Resources, u Bah Brolding Nongsiej, u Syiem,
ka Hima Nongkhlaw, u Pai’em P.M Syiemlieh, u Commissioner of Transport ka sorkar jylla, u Bah I. W Ingty, u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka District, u Bah M.B Syiem, ki nongtrei jong ki tnat treikam bapher bapher jong ka sorkar jylla, ki Nongialam Shnong, ki Principal jong ki skul ka thain bad kiwei ki wei.
Ha ka jingkren jong u kum u Kongsan, u Lamphang ka Iing Dorbar Thaw ain ka jylla, u Bah Metbah Lyngdoh u la pynpaw ia ka jingkmen ban iadon bynta ha kane ka prokram bad u la ai khublei ruh ia u myntri bad baroh ki nongtrei ka tnat Transport ka jylla namar ka jingpynkloi jongki ia ka jingplie ia ka ophis u DTO hapoh ka distrik kaba long kum shibynta ban pynjan shuhshuh ia ka synshar khadar sha ki paidbah nongshongshnong.
Haba kren halor kiba bun ki jingjia aksiden kali kiba iai jia na ka sngi sha ka sngi, u Bah Metbah u la kyntu ia ki nongshongshnong ban long kiba phikir ha ka por niah kali, ba kin pynbiang ia ki kot ki sla bad ban bud pyrkhing ia baroh ki ain ki kyndon khnang ban lait na kino kino ki jingjia aksiden ne ki jingjia ba sngewsih.
U Lamphang ka iing dorbar thawain ka jyll u la ong ruh ba ka jingplie ia ka ophis u DTO hapoh Mairang kan pynthikna ba ia ki kyndon ain ka tnat Transport la bud pyrkhing da baroh ki paidbah nongshongshnong na ka bynta ka suk ka shngain ki nongniah, ki nongshongkali bad baroh ki paidbah.
U Lamphang, ha ka jingkren jong u, u la ban ruh halor ka jingkordor jong ka khajna ban kyntiew ia ka roi ka par jong ka ri bad ka jylla bad u la kyntu ia ki trai kali ban siew deipor ia ki khajna ban lait na ka jingshah dain kuna na ka daw jong ka jingsiew dierpor ia ka khajna da ki trai kali. Ha kane ka sngi la iathuh ba ha Meghalaya ki don kumba 1000 tylli ki kali ba register man ka sngi.
U Myntri ka tnat Transport ka jylla, u Bah Dasakhiat Lamare, ha ka jingkren ka jong u, u la kren shaphang ka jingshngain jong ki nongniah bad nongshong kali bad u la kyntu jur ia ki paidbah nongshongshnong ban siew biang por ia ka khajna, ban bud ryntih ia baroh ki ain bad jingbthah kiba kynthup ia ka jingdeng ia u seat belt, ka jingpyndonkam thikna ia ki signal ha ka por niah kali, ka jingkiar na kaba pyndonkam ia ki mobile phone ha ka por niah kali, bad kumta terter.
Katba, u myntri ka tnat Water Resources uba long ruh u MLA ka Mawthadraishan, u Bah Brolding Nongsiej ha ka jingkren jong u u la ong ba ka jingdon jong ka ophis u DTO hapoh Eastern West Khasi Hills District kan pynsuk ia ki paidbah ka thain ha kaba iadei bad ki kam kali.
Ha kane ka prokram la ioh ruh ban pynsngew da u Commissioner of Transport, ka jylla, u Bah I.W Ingty ia ka jingshakri kiba ka ophis DTO kan ai kiba kynthup ia ka jingbuh ia ka thup ki kali kiba la rejistar hapoh ka distrik, ka jingai bad jingpynthymmai ia ki laisen, ki permit, ki syrnot bapher bapher, ka jinglum khajna, ka jingpyntreikam ia ki ain bad ki kyndon bapher bapher bad kumta terter.
Lah ban kdew hangne ba ha ka ophis jong u District Transport Officer ka Eastern West Khasi Hills, nalor u DTO, yn don ruh uwei u Motor Vehicle Inspector (MVI), uwei u Upper Divisional Assistant (UDA), uwei u Assistant System Engineer, uwei u Peon bad uwei u Chowkidar.
Kiwei kiwei pat kiba la kren ha kane ka sngi ki kynthup ia u Deputy Commissioner ka Eastern West Khasi Hills District, u Bah W. Nongsiej bad u District Transport Officer ka Eastern West Khasi Hills District, u Bah W. Makdoh. Ia ka prokram ha kane ka sngi la pyniaid da u Additional Deputy Commissioner ka Eastern West Khasi Hills District, u Bah A. Nongbri.
