Shillong, Jymmang 30: Ha ka kyrwoh kaba la phah mynta ka sngi da ka KSU South West K
hasi Hills District ka pynpaw iaka jingpyrshah halor ka jingpyrshang ka sorkar ban wanrah nongtrei bar jylla bad naka liang ka seng ka kwah ban kren shai ba ia kane ka hukum jongka sorkar ki kum ka seng kin nym ailad ba kan treikam hapoh jongka South West Khasi Hills District bad haki bynta jong ka Mawsynram Block.
Ka seng ka kren shai ba haka jingshisha kum ka seng ki pynpaw ia ka jingkhublei ia ki bor District jongka South West Khasi Hills District, ki rangbah shnong bad ki volunteers shnong kiba la shim khia baroh shikatta ban peitngor halor ka rung ka mih, ka iaid ka ieng bad ban pyntreikam iaki orders jongka sorkar.
Hynrei Kane ka jingleh jongka sorkar Meghalaya ka long kumba Theh umpjah iaka mynsiem iatreilang jong ki kum ka seng bad jong ki nongialam shnong ruh kumjuh. Kane ka order kan sa buh jingma iaki paitbah ka dong ka thain khamtam haki jaka khappud bad haki jaka ba don par dewiong jongka South West khasi Hills District bad Mawsynram Block.
Ka seng ka sngew ban ong ba kane ka jingleh jongka sorkar ka pyni ba ka shu kwah pyndonkam iaka mynsiem iatreilang jong ki paitbah hynrei kim don pat iaka jingsngewkhia ba shisha halor kumno ban iakhun iaka khlam corona virus.
” Kaei ka jingmut ban khang iaka iaid ka ieng na kawei ka District sha kawei pat lada ka sorkar ka dang khot sngewbha iaki nongtrei bar jylla ban wan khamtam ha kane ka por kaba ngim pat thikna Shano kan ialam “.
Kane ka jingleh jongka sorkar ka dei ka jingshetkylla iaka mynsiem iaishah jong ki paitbah khamtam ha South West Khasi Hills District kaba ki paitbah ki hap iaishah iaka jingkhang iew khang hat ne ka jingteh pyrkhing iaka iaid ka ieng tang na bynta ban lait na u corona virus.
Jan man ki shnong ha South West Khasi Hills District ki da pynlut ka sngi bad ka pisa ruh ban pynbiang iaki quarantine centre na bynta ki traishnong ba wan na bar jylla bad ym tang katta hynrei ki da pynbiang ruh iaki volunteers shynrang bad kynthei ban pynthikna ba ka don ka jingiaid beit katba kum ki jingbthah ja sorkar haba iadei bad ka Quarantine.
Kum ka seng ka pynthikna ba kan nym don ka Community Transmission hapoh ka District wat lada kin don makna kiba iohpang namar ki quarantine ki la biang hynrei ka jingkhot sngewbha iaki bar jylla ban wan trei noh ha kaba kum kane ka por daka sorkar ka dei ka ” Suicide Mission” bad ka sorkar ka hap ban shim iaka jingkitkhlieh lada kan mih ka jingsaphriang u khniang jingpang hadien ia kane .
Ka sorkar haka jingshisha ka la dei ban pyrkhat kumno ban tehlakam shwa iaka jingsaphriang ka jingpang corona hapoh ka jylla, ka la dei ban pyrkhat shwa kumno ynda la lah ban tehlakam iaka jingsaphriang kan plie iaki iew ki hat bad kumta terter hynrei ka jingkyrkieh ban wan ialam nongtrei na bar jylla ka dei ka jinglehkai iaka Koit ka khiah hapoh ka District hi baroh kawei.
” Kiwei ki jylla kum ka Maharashtra ki ialeh ban pynrung haki kam ki jam iaki trai shnong hadien ba ki ba ki nongtrei Kila leitphai sha la ki jylla jongki hynrei Kaei kaba ka sorkar jongngi ka leh imat ka don iaka policy ban teh Pyrkhing tang iaki trai shnong kiba ki tip ba ki lah ban tip iaka iaid ka ieng jongki hynrei ki pyllait laitluid bad plie lynti pat iaki nongtrei ban wan na bar jylla ia kaba kim lah ban tip iaka iaid ka ieng jongki.
Ka jingong jongki bor sorkar ba la shah ia ki bar jylla ban wantrei tang iaki kam bymlah ban trei daki traishnong ka dei tang ka jingthok jingshukor iaki paitbah bad ngi kwah ban buh ruh iaka jingkylli ba ” Hato ha kaba kum kane ka por jongka khlam COVID 19 khamkor kata ne khamkor ka jingkoit jingkhiah jong u paitbah”.
Ka seng kam pyrshah iaki bar jylla hynrei ha Kane ka por ngi kham jied iaka koit ka khiah u paitbah khamtam ha kane ka por kaba ngim pat lah ban ong ba ka dong ka thain ka la lait naka khlam corona virus.
Ka KSU South West Khasi Hills District ka la dep bthah iaki Circle bad ki units ba kin ialeh pyrshah ia kane ka ANTI – LOCAL POLICY jongka sorkar da kaba ngin nym ailad daleilei ruh em ia mynta ba ka sorkar ne ki bor District kin wanrah iaki nongtrei bar jylla hapoh jongka Mawsynram Block bad ka South West Khasi Hills District.
Ka KSU ka ong ba kila ioh jingtip ba ka la don ka jingpynrung kyrteng iaki bar jylla ban wan haka District hynrei ka seng ka la iai ba kan nym ailad ia kane ka jingpyrshang hapoh ka thain bad ngin nym shah daleilei ba kin rung hapoh ka District ne hapoh ka Mawsynram Block.
Kane ka long daka jingthmu ban tehlakam hi noh iaka jingsaphriang u corona virus hapoh ka thain namar ka sorkar ka la Phiel ban leh iala ka bynta. Ha kajuh ka por ka seng ka kyntu iaki nongialam shnong, Seng samla shnong bad ki volunteers shnong ban Pynthikna ba kan nym don ka jingwan rung ki briew na bar jylla hapoh ki shnong jongki.
Lada la jan lai bnai ki shnong bad ki paitbah ka District ki la iatreilang bad ka sorkar bad kane ka jingiatreilang ka la long kaba jop ha kaba la lah ban tehlakam ba kane ka khlam kam shym la poi hapoh ka thain haduh mynta kum ki shnong ngim dei ban ailad ha ka sorkar kan pynpulom iaka jingtrei shitom jongki baroh shikatta da kaba shetkylla iaka jingshaniah jongki paitbah iaka sorkar.
Ka seng kan sa phah jingthoh sha ki bor District bad sha ki nongmihkhmat ka thain halor kane ka mat bad lada ki Phiel halor kane ka bynta maki kin hap shim jingkitkhlieh halor kane ka bynta. Kane ka dei ka kyrwoh na u samla Forwardman Nongrem, President KSU South West Khasi Hills District.
