Shillong, Nailar 09: Ka seng ka pyrshah jur ia ki kyndon phylla jong ka sorkar jylla pyrshah ia ki dukan die doh sniang bad doh Masi, kiba don ha shilynter ki dukan ka thain upper Shillong.
Ka Commissioner of Food Safety ka la bthah ia ki dukan die doh ban ai rong, ban ker da ka iit ia ka dohba die, ban phong ki jain ba khuid, ha kine ki sngi ba la dep. Kine kidei ki ba donkam ym tang ha ki dukan jong ka thain upper Shillong hynrei ha baroh kawei ka jylla, bad kane kadei ruh ka kamram jong ka Food and Safety Department na ka bynta ka koit ka khiah jong u paidbah.
Hynrei ka seng ka sngew phylla ban iohi pat ba kane ka tnat ka la bthah ruh ia ki dukan ban ai rong saw ia ki ba die doh masi bad rong lieh ia ki ba die doh sniang, bad kaba kham sngewphylla ka long ba la bthah ruh ban burieh ia ka doh lyngba ka iit iong khnang ba ki tourist mynder ki ym iohi.
Ha kaba iadei bad kine ki kyndon phylla ka seng ka kwah ban kren shai ba kane kam dei ka kamram jong ka Food and Safety, hynrei kine ki kyndon phylla ki kdew shai ba ka sorkar jylla ka la ioh ia ka jingbthah na ka sorkar pdeng ban burieh ia ki doh kiba ngi ki riewlum ngi bam naduh kulon kuman tang naka bynta ka burom jong ki bar jylla ki bym bam doh sniang lane doh masi bad kane ka long ka jingniewbieng ia ki riewlum.
Ki tourist kiba wan kai sha ka jylla ka jong ngi kim don hok ban tuklar kaei die lane kaei kaba bam, bad lada kim sngewtynnad kan bha ia ki ban ym wah sha ka jylla. Ban ai rong saw ia ki dukan die doh Masi, rong lieh ia ki dukan die doh sniang bad ban burieh ia ki da ki iit iong ka long ka jingkhien poh ia kum ki riewlum, bad ka sorkar kadei ban weng mardor kum kine ki kyndon, kane ka long katkum ka kyrwoh kaba la phahd a u bah Thomas Passah President ka seng samla ka KHNAM.
