Shillong, Jymmang 14: Ka Sur u Paidbah ka Bri u Hynniewtrep lyngba ka WhatsApp Group kaba buddien ia bun ki jingjia ha kylleng sawdong ka Bri u Hynniewtrep, ka pynpaw ia ka jingsngewsih ka bakhraw halor ka jingiohlad jong ki Bar Jylla ban ruh sha Meghalaya da ki truck na Dkhiah, East Jaintia Hills District.
Ka SPKBH kala ong ba lada kan jin da la dei ia u Khasi u Pnar ki Pulit kin da la dain kuna khlem duna Rs. 2000.00 marwei kumba ki la leh ha Laitlyngkot kiba ki hap ban mih na kidaw bym lah kiar, hynrei ia kitei ki Bar Jylla kiba wan rung syndon da ki truck kaei ba ki Pulit ki la leh. Ngi dawa ia ka jingpynshai kaba thikan na u Home Minister.
Ka SPKBH ka pynpaw ruh ia ka jingsngewpyrshah kaba jur ia ka rai jong ka Sorkar Meghalaya ban phah Home Quarantine ia kiba wan phai na Rajasthan bad Assam. Haba ka Sorkar Jylla ka la dei thaw ia ki Community Quarantine Centre ha man la ki Shnong ia kiba yn khmih bniah da ka IDSP Committee jongka Sorkar namar ka Sorkar kam lah bor ban phah Quarantine ia baroh ha ki Government Quarantine Centres.
Baroh ki la iohi bad tip ba ka Home Quarantine ka long kumba tong um ha ka ruh syiar kumba ka la jia ha Nongrim Hills Shillong na ka Quarter jong ki Doctors ki Nurses, ki Staff jong ka Bethany Hospital, ba kato ka briew kaba la shah quarantine ka mih ban leit thied doh bad kiwei kiwei kaba tang hadien katto katne sngi la ioh ia ka report jong ka ba ka dei kaba la long Positive, kata kaba la ngat ia u Coronavirus, bad ka Sorkar ka la hap ban leh tracking ia kito baroh kiba la ia kynduh ia ka.
Ka SPKBH kam sngewthuh shuh balei ka Sorkar kaba la rai ban buh ia kiba leh Quarantine ha ki Community Quarantine Centre mynta ba hadien ba la lap ia ka case ba iwei iba leh Home Quarantine I leit thied doh, ka sorkar ka pynkylla ia ka rai ban leit hi sha ka Home Quarantine.
Lada jia ba jia kaba sniew na kine kiba wan phai na kylleng ka Ri India, kata, ba ki long Positive haba leh Qujarantine ha la iing, kane ka Sorkalr ka la dei ban risain shi syndon namar ka don jingthmu ha lyndet ban ailad ia u COVID 19 ban pur ha ka Ri jongngi, ka shim ia ka risk kaba khraw tam; ngi la jan jop ia u Coronavirus namar la sah sa tang ine I khynnah trei u khun u (L) Dr. Sailo, ka Sorkar imat ka myntoi haba Lockdown lymda kumta balei ia kiba wan na ki Red Zone kan phah Home Quarantine.
Kiba bun ki Shnong ki la pynkhreh bha ia ka Community Quarantine Centre kum ka Shnong Mawryngkneng, ka Shnong Umphrup, ka Shnong Mawtharia Ponlakrai bad kiwei kiba ngim lah ban jer kyrteng. Ka Sorkar kan hap ban risain l namar ka iaid da ka lynti bym thikna (Home Quarantine).
Ka SPKBH ka pynpaw ruh ia ka jingsngewsih ka bakhraw ba ka la long kum ka jingthok jingshukor ia ki paidbah baduk batoi ba la kular ia ka Shihajar Tyngka hynrei ba la pynhap sha ka Hynniew spah bad ia kata ruh haduh mynta bun hi ki bym pat ioh la jan dap ar bnai tam ne duna.
Ki Steel Fabrication Industries (Karkhana) kiba nud ki la plie la ka plie kiba ap hukum Sorkar ki shah tyrkhong raw, la shah ban tei ia ki building hynrei khlem ki karkhana shna grills, windows, kumno ka kam kan iaid.
Ka Group da kawei ka jingmut ka kyntu ia ka Sorkar ba kan bthah ia ki Pulit ba kin ym lute na ki paidbah kum ha kane ka por, ba kaba ki don ruh ka dei ka pisa ia pan kylliang. Dei ban sngap ia ka jingeh jong ki paidbah ym dei ban fine kum ha kane ka por.
Lada ka Sorkar kam sngap ia kine ia jingai jingmut ka group kan pynlong da ka jingiakhih paidbah pyrshah ia ka Sorkar. Kane ka long katkum ka kyrwoh kaba la phah da u Chairman ka tei ka kynhun u bah HS Shylla bad u bah E Kurkalang kum u Secretary.
