Shillong, Naiwieng 16: Ka Deputy Commissioner jong ka Ri Bhoi District mynta ka sngi kala khot ia ka jingialang ia ki seng bhalang ban ia mir jingmut ha kaba ia dei bad ka lynti rel ban shna ba kan iaid lyngba ka District.
Ha kane ka jingialang kiba bun ki seng bhalang kiba na Ri Bhoi District kila wan ban ia shim bynta ban sngap ia kaei kaba ka sorkar ka don ban kren halor ka lynti rel kaba hap hapoh ka tei ka District ha dien bala ia kren na ka liang jong ki seng bhalang da kawei ka sur kila ieng bad pynpaw ia ka jingpyrshah ia ka jingthmu ban shna ia ka lynti rel.
Ha kane ka jingialang la sngewthuh ba ki seng bhalang baroh ki kwah ba ka sorkar kan pyntrei kam shuwa ia ka Inner Line Permit ha kane ka jylla bad hadien ba la pyntrei kamia ka ILP kin sa ia kren ia ka lynti rel ha kane ka jingpyrshah lynti rel bun ki nongialam ka KSU kila shah kem bad shah set byndi.
Ki seng bhalang kiba la poi sha kane ka jingialang ki long ka, Khasi Students’ Union , Federation of Khasi Jaintia & Garo People, Ri-Bhoi Youth Federation, Ri-Bhoi Students’ Union, Confederation of Ri-Bhoi People, Hynñiewtrep National Youth Front, Hynñiewtrep Achik National Movement, Garo Students’ Union bad ka Hynñiewtrep Youth Council bad kiwei dei.
Ha kane ka jingialang na ka liang jong ki bor ka District la lam khmat ia ka jingiakren da u bah B.J Kharchandy, ADC ka district, ki heh pulit bad ka jingdon lang ki heh ka North Eastern Frontier railway bad kiwei kiwei bad kane ka jingialang kala pulom da ka jingmih noh ki seng bhalang shabar ban pyrshah ia ka jingthmu ban shna ia ka Lynti Rel.
