Shillong, Jylliew 23: Ka Khasi Hills Autonomous District Council ka la rai ban kyrpad ia ka Sorkar Jylla ba kan ai jaka ia ka Council ha New Shillong Township, ba kan pynkynriah noh ia ka ophis ne ka Khasi Hills Autonomous District Council sha katei ka jaka.
Haba iakren bad ki nongthoh khubor, u Bah Pyniaid ula ong, Ka EC ba thymmai ka la shong bishar ia ka jingtyrwa mang tyngka jong u snem 2023-2024 bad rai ban kynthup ia ka jingtyrwa ban kyrpad na ka Sorkar Jylla ban ai jaka lem, ba ioh pynkynriah noh ia ka Council Building ha New Shillong Township.
Na ka daw jong kane ka long namar ka Council ka la mad ia ka jingkhapngiah namar baroh ki lai tnad treikam-ka Executive, Legislative bad Judiciary- kila iatreilang na kane ka Ophis.
U Bah Pyniaid Sing Syiem ula ong, bun na ki Tnad ba kongsan jong ka Sorkar Jylla ruh la pynkynriah sha New Shillong ban pynkylluid ia ka Nongbah Shillong. Kumta ka District Council ruh ka donkam ban leh kumjuh naka bynta ka jingsuk jong baroh lang.
Haba kylli, u CEM u la pyntip ba ka Council kan sa thaw ia ka Committee kyrpang ka ban khlieh da u EM ba khmih ia ka Council Assets & Building, ba kan iakynduh ia ka Sorkar Jylla ha ka ban iakren ia kane ka kam.
U la pynkynmaw ruh ba, Ia kane ka jingtyrwa la wanrah nyngkong eh ha u snem 2019. Hynrei namar ka jingpynjari ia ka jingsynshar u Lat ne Administrator Rule ha katei ka por, ka Council ka la pynsangeh noh shuwa ia kane ka jingtyrwa.
U Bah Pyniaid ula ong ba ka EC kan dang shim rai ba kumno kan pyndonkam ia ka Building ba mynta hadien ba la pynkynriah sha New Shillong Township. Hynrei, namar ba ka don hapdeng ka jaka iew, lehse lah ban pyrkhat ba kumno yn lah ban pynmih pisa na ka building hynrei yn sa shim rai kham hadien halor kane ka bynta.
Ha kajuh ka por, u Bah Pyniaid ula pyntip ba ka Executive Committee ka la shim rai ruh ban pyntreikam noh ia ka Trading by Non Tribal Regulation Act kumba ka long.
Ka EC kan dang iai bteng ban leit talasi ia ki kam khaïi be-ain jong ki bar Jylla bad kan leh tyngeh kaba lah ruh ban long da ka ba khang syndon ia ki dukan jong ki bym don Trading Licence na ka Council.
Haba bynrap ba ka EC kan pyrrkhing bha pyrshah ia ki kam khaïi be-ain hapoh u pud u sam jong ka Council. U la ong, nalor kane, ka EC ka la ai jingmynjur ruh ia ka KHAD Services (Amendment) Rules, 2023 kaba thmu ban pynjynsur ia ka rta iohkam jong ki samla wadkam hapoh ka Council ka ban long haduh 37 snem ka rta. Ka EC kan sa wanrah ia ka Bil1 ha kane ka Dorbar Lyiur ba mynta.
U Bah Pyniaid u pyntip ruh ba ka EC ka la ai jingmynjur ia ka KHAD (Protection and Promotion Traditional Medicines) (First Amendment) 2023. Kane ka dei kaba don jingiadei bad ka jingai syrnot ia ki nongsumar briew hapoh u pud u sam ka Council.
Haba ia dei bad ka jingshong suk ki paidbah ha khappud kiba ia khap bad karbi, u CEM la ong ba un leit ban jngoh ia kitei ki jaka kiba hap ha Block-II, la ong ba u la dep ban ia kren bad u CEM ka KAADC bad kum juh ia u MP katei ka jaka bad baroh ar ngut ki pynpaw ia ka jingkwah jong ki ban don ia ka jingshong suk.
