Shillong, Jylliew 04: Ka Executive Committee jong u bah Titosstarwell Chyne hapoh jong ka KHADC ha ka jingiashong pyrkhat kam mynta ka sngi kala shim ia ka rai ban pyntrei kam pura ia ka ain kaba ia dei bad ka khaii pateng kam bylla kam sngi jong ki briew kiba wan na sha Bar ka jylla.
U CEM, u Bah Chyne u la iathuh ba hapoh jong ka ain Trading by Non Tribal 1954 ka don ka kyndon kaba ong ba wat ki nongbylla ki don kam ban ioh ia ka jingbit na ka District Council, ha dien ba ka sorkar kala pyntrei kam ia ka Work Permit ki District Council kim lah shuh ban ai Labour Licences.
U Bah Chyne u la ong ba katkum ka United Khasi Jaintia Hills District (Trading by Non-Tribals) Regulation, 1954 ka District Council ka don ia ka hok ban iada, dei halor kane ka nongrim ba ka EC kaba la long mynta ka sngi kala shim ia ka rai ba lada ka sorkar ka shah ia ki briew ba na bar ban wan trei kam hap ban shim ia ka jingbit na ka KHADC.
U CEM u la ong ba ia kane lah ban apply da u Kontrator lane kino kino ki tnad jong ka sorkar kiba wan rah briew na sha bar ban wan trei bylla ha ki bynta jong ka KHADC. Mynta ka paw ba palat phew hajar ki briew ki leit bylla sha bar ka jylla namar ba kim don kam ha ka jylla.
La iathuh shuh shuh ba ha kane ka jingialang jong ka EC mynta ka sngi kila shim ia ka rai ba ia ki pung dohkha jong ka KHADC kiba don ha Lailad ha Ri Bhoi District yn wad ka lat ka lynti kumno ban pynlong ia kum ki pung dohkha kiba lah ban ai jingmih ia ka Council, la aiti ha u EM ba dei peit ban pynkhreh ia ka skhim.
Haba ia dei bad ka District Council Court katkum ka jingbthah jong ka High Court jong ka jylla Meghalaya, ka EC kala shim ia ka rai ban pyntrei kam noh ia ka Video Conference ban lah shim ia ki jingtian bishar bad ba kan don noh iala ka jong ka website ba ki briew ki lah ban ujor ne piet ia ki kam kiba ia dei bad ka kam kashari.
Haba ia dei bad ka musur kaba ia dei bad ki mar khlaw kiba mih na ki jaka jong ka KHADC ka EC kala shim ia ka rai ban pynkiew noh da 100%. la iathuh ba kane ka musur ka dei kaba la pyntrei kam naduh u snem 2010 bad mynta kala dei ka por ban hap ban pynkiew katkum ka jingiaid jong ka por.
