Shillong, Nailur 25: Ka jingialang jong ka Kabinet kaba la shong mynta ka sngi kala shim ia ka rai ban iarap ia ki nongrep ka jylla da kaba pynsiew lem ia ka sut jong ki nongrep kiba shim ia ka ram rep kaba la tip kum ka “Kisan Credit Card”.
Ha ba kren ha ki lat pathai khubor ha dien ka jingialang u myntri rangbah ka jylla u Conrad K Sangma u la ong ba ia kane ka phang la wan rah da ka tand rep ban iarap ia ki nongrep ha kum kane ka por ba la shah ktah ha kane ka khlam COVID-19.
Haba jubab ia ki jingkylli u myntri rangbah u la ong ba ki nongrep kiba la resgiter ia lade ki don palat ia ka shilak ngut, hynrei kumba ka paw mynta kiba la shim ia kane ka ram rep ia kaba la tip kum ka “KCC Loan” ki long tang 19000 ngut antad lah ban tam ne duna ruh.
Katkum ka jingkhein antad ia mynta ka sorkar kan hap ban sei pisa ha ka shisnem ban iarap ia ka sut jong ki nongrep kan kot sha ka T.2.5 klur tyngka bad kane kan long man u snem.
Ban pynsted ia ka jingpyntrei kam ha kaba ia dei bad ka Chief Minister Rural development Found kaba dei T.8 klur bad ka Chief Minister Urban development Found kaba long T.4 klur ka kabinet mynta ka sngi kala shim ia ka rai ba ia kine ki ar tylli ki skhim la pynkylla sha ka Chief Minister Special Development Found (CMSDF).
La iathuh ba ka jingmang pisa ha kane ka CMSDF kan long hi T.12 klur bad ban pynsted ia ka jingtrei kam ia kane ka skhim yn pyntrei kam beit lyngba ka Chief Minister secretariat, la leh ia kane ban pynkloi ia ka jingtrei kam namar ha kine kip or ba la leit kala bam por palat namar hap ban iaid lyngba bun ki kyndon.
