Shillong, Nailar 11: Ha ka jingialang jong ka kynhun myntri Ka Sorkar Jylla ba la long hynne ka sngi ka shim ia ka rai ban ai jingmynjur ia ka “Mid-Career sponsored courses” ne ka jingleit pule pyntbit ba la bei tyngka da ka Sorkar, na ka bynta ki ophisar ba bat ia ka kyrdan kaba heh, khnang ba kin kham shemphang bad ban lah shakri kham bha shuh shuh ia ka Jylla.
U myntri sorkar u ba dei ruh u nongaiktien jong ka sorkar u bah Paul Lyngdoh u la ong, Ka kynhun Myntri ka la iakren ban shah ia ki ophisar ka jylla ba kin leit pule biang ban pyntbit ia lade kum ki ophisar ka All India Services.
ia ki ophisar ka Meghalaya Civil Service, Meghalaya Police Servce, Forest and Finance Services ba kin nang pynproh jabieng bad ban pynjanai ia ka jinglah shakri ki Ophisar jong ka Jylla, kaba long kongsan ha ka jingiatreikam hapdeng ki bor synshar sain pyrthei bad ki paidbah.
U Bah Paul u iathuh ba ha kane ka jingiakren, ka Sorkar ka la rai ruh ban pynshlur bad ai ia ki jingmyntoi ia ki Ophisar ba kin bteng ia ka jingleit pule pyntbit ha ki University bapher bapher, kiba ai ia ki degree bad diploma kiba kham heh kyrdan bad ia kine yn shim da ki Ophisar jong ki khlem da pynthud pat ia ka kam, kaba mut ba kin ym shim satia ia kano kano ka shuti ha ka por ba ki dang don ha ka jinghikai pyntbit.
U Bah Paul u iathuh ba ia kine ki jinghikai la dei ban ithuh bad ki kynthup ia ka MBA ba la tyrwa da ka IIM Shillong, Master in Public Policies kaba don ka online courses ba la tyrwa da ka OP Jindal Global University, Professional Certificate Programmes bad Data Science bad AI kaba dei hi ka online courses.
Ia kane ka jinghikai la tyrwa da ka Indian Institute of Informatn Technology, Bangalore lane University of Merriland, Ph.D Programme ba la tyrwa da ka IIM Shillong bad ka part time PH.d bala tyrwa da ka Jindal Global Law School bad IIT, Executive fellow in Management lane Ph.D in Management Programmes ba la tyrwa da ka IIM.
Kum ka jingai jingmyntoi ia kine ki Ophisar, u Bah Paul ula ong ba ka Sorkar Jylla ka la mynjur ia ka jingtyrwa ban bei ia ka bai pule lane ka tution fees ia ki programme haduh T. 15 lak ia kaba la buh ruh ia ki kyndon kum ka nuksa.
Ki Ophis ki dei ban dang don sa 7 snem ha ka jingshakri, ki dei ban shim ia kane ka jingpule kum ka part time khlem kano kano ka shuti pule kot bad manla u snem haduh 3 ngut ki Ophis kin ioh leit pule bad yn bei tyngka da ka Sorkar.
u Bah paul u la pyntip ba ka Sorkar kan sa thaw ruh ia ka Committee kaba sa khlieh da u Chief Secretary, ka ban sa bishar bad ai jingmynjur ia ki application jong kine ki Ophisar.
Ha kajuh ka por, ka Kynhun Myntri ka la mynjur ruh ia ka draft jong ka jingkren lamphrang ha ka sngi rakhe ia ka Sngi Laitluid ka Ri, ka ba kdew ia shibun ki kam ba ka Sorkar ka la leh naduh ba ka shimti ia u lakam ban synshar.
