Shillong, Nohprah 02: U myntri kam poh iing jong ka sorkar jylla u James K Sangma u la iathuh ba ka jingialang jong ka kabinet kala shum ia ka rai ban pynkiew noh ia kabai shong kali kaba dei ia ki Maxi Cab bad kum juh ia ki Tourist Taxi.
Haba kren ha ki lad pathai khubor mynta ka sngi ha dien ba la kut ka jingialang jong ka kabinet, u la ong ba la shim ia kane ka rai ka long ba kala don ka jingkiew dor ha baroh ki liang ha kaba ia dei bad ka ki kali, naduh ka dor kali haduh ki tiar ki tiar. Ka jingpynkiew ia ka bai kali la leh khatduh ha u snem 2011.
Kiwei pat ki rai kiba ka kabinet la shim mynta ka sngi ka long ka Meghalaya State Direct Selling Guideline kane ka long ban iada ia ki briew na ka jignshah thok ha kaba thied jingthied lyngba ki online.
Ka kabinet kala pdiang ruh ia ki rule ba thymmai jong ka Meghalaya lotary Rule 2019, ia kane ka jingpynialeh khlai ha ka jylla la pynsngeh mynta la 11 snem bad kane kala wanrah ia ka jingduh ia ka sorkar jylla.
Ka kabinet mynta ka sngi kala pdiang ruh ia ka rai ban pynkiew noh ia ka bai kamra ha ki Meghalaya House kiba don ha kylleng ka ri, ka jingpynkiew ka long mynta T.200/- tyngka shikhlieh ia ki briew sorkar ba leit ha ka kam sorkar, ia kiba leit ban sumar kan long T.300/- tyngka ia ki nongtrei sorkar.Haba ia dei bad ki riew paidbah ka bai kamra la pynkiew sha ka T.1550 tyngka shimiet.
Ka kabinet mynta ka sngi kala pdiang ruh ia ka Lokayokta Rules 2019, ia ka ain la wanrah naduh u snem 2014 hynrei ia ka rule la ban thaw mynta ia kaba la ioh ia ka jingmynjur jong ka kabinet. Kane ka Rule kala batai ha kaba ia dei bad ka jingsiew ia ki briew bad ia ki jingujor kaba ki paidbah ki kwah ban ai.
