Shillong, Naiwieng 16: Ha kane ka jingialang ka kabinet kala shim ia ka rai ruh ba ia ki kot pule jong ki khynnah skul yn shim ia ki kot pule jong ka NCERT da kaba shim ban don ka jingpynbeit haki katto katne ki subjek ban pule ia kata yn leh da ka MBOSE nangne sha khmat bad kane kan sdang na u snem pule ba thymmai kane kan long naduh klass I haduh klass X.
Na ka bynta kito ki skul kiba hikai ha ktien la jong na ka bynta kine ki skul na ka bynta kine ki skul kan long naduh klass I haduh Klass V, u myntri rangbah ka long ba ka jingshim ia kane ka long ba ki don ka jingsngewkhia ha kaba ia dei bad ki jingpule baroh kawei.
Halor kane ka rai ka long ba la dep ban ia kynduh ia kiba bun bad ka jingwat bniah haki bynta bapher bapher ha ka jingpule la poi sha ka rai ba bun na ki kot kiba la pyndon kam da ka MBOSE khamtam ha ki lai tylli ki kot, Science, English bad Mathematic kine ki kot kim iahap kyrdan bad ka jingpule ha ka ri baroh kawei.
Ban pynbha ia ka jingpule jong ki khynnah ka kabinet kala shim ia kane ka rai bad ban pynbha ia ka jingioh jingtip jong ki khynnah ha ki skul rit, ki kot kiba la pyndon kam kim ia hap bad ka jingthmu kumta ban kyntiew ia ka jingpule la hap wan rah ia ka jingkylla ha ka jingpule.
Kane ka rai ka long ruh ban pynduna ia ki kot, kumba ka long mynta na ka bynta klass-I haduh klass-III ki don khatwei tylli ki kot kiba la mynjur ka MBOSE katba ha ka NCERT ki don tang saw tylli ki kot, na ka bynta klass V ki don 17 tylli ki kot jong ka MBOSE katba jong ka NCERT ki duna ia ka 10 tylli.
Hynrei kan don ka jinghikai kaba bha na ka bynta ki khynnah bad kine kin long kiba ia ryngkat bad ki jingpule ha ka Ri baroh kawei, kane ka long ruh ban pynthikna ba ka jingbuh ia ka rukom hikai kan long kaba ia ryngkat ha ka ri baroh kawei.
Ka kabinet ka long shai ba ka jinghikai ha kaba ia dei bad ka riti dustur bad kaei kaba kum ki trai shnong ki don, kum ia ki history bad ka jinglong kyrpang ia kine ym dei ban pynthud dei ban pynneh pynsah ia ki ia kine ruh ym pynbha ha ka kyrdan jong ka NCERT. Khmih lynti ban ioh ba ia kane yn sdang ha ka jingpule kiba da kawei ka snem jing pule.
Ha kane ka sngi la shim ruh ia ka rai ban thung ia ka “Permanent Education Recruitment Board” kumba ia tip ia kane la leh ruh na ka bynta ka tnad ka koit ka khiah ha kaba ia dei bad ka jingthung kam. La hap ban leh ia kane namar bun bah ki kam kiba lait hynrei ka MPSC ka shem jingeh pynlong ia ki eksamin thungkam.
Haduh mynta ki don 187 tylli ki kam hikai kiba lait hapoh ka tnad pule khamtam ha ki kyrdan pule kiba kham sha jrong bad na kine ki kam kiba lait kila long thylli mynta la lai saw snem kumta la donkam ban don ia ka Board, kane ka board kan pyndep ia kane jingthung kam hapoh kine ki lai bnai ban wan lada slem eh kan long 6 bnai.
Kane ka Board kan peit ia baroh ki jingthung kam ha kaba ia dei bad kka tnad pule, ia mynta kin pyndep shuwa ia ka jingthung kam ia ki hapoh ka tnad pule bad ynda la dep ia kane wat ka jingthung kam ia ki kam hikai ruh yn pynhap ha kane ka board ba kan leh ia ka kam ban thung kamhikai bad kane kan long naka bynta ka tnd pule, ka rukom thung kam hikai kan long kumba juh long tang kan hap hapoh ka jingpeit jong ka Baord.
