Shillong, Nailar 11: Ka Sorkar kala shim ia ka rai ha ka jingialang jong ka Kynhun Myntri ba la long mynta ka sngi, ban pynshong nongrim bha bad ban buh da u pud ia ka jingleit bar-ri jong u Myntri Rangbah ka Jylla, ki Myntri Sorkar bad ki Ophisar ka ban long noh tang arsien ha kawei ka snem mang tyngka.
U bah Paul Lyngdoh u ba long u nongai ktien ka sorkar, haba iakren bad ki nongthoh khubor, u la ong, hooid, katto katne na kine ki jingleit bar-ri ki dei halor ka jingshah khot sngewbha, ki jingialang, ki jingleit kum ka kynhun bad kumta ter ter ha ki prokram bapher bapher kum ki project ba bei tyngka na shabar ri ka jingshah hikai pyntbit kyrpang bad kiwei kiwei.
Hynrei ha ba buh hakhmat ia ka pla tyngka ka Jylla bad ruh halor ka jingdonkam ban pynshong nongrim bha ia kine ki jingleit, la shim ia ka rai ba nangne shakhmat, ka jingleit bar-ri jong ki Heh ka Sorkar Jylla kynthup ki Nongtrei contract kan long noh tang arsien ha kawei ka snem mang tyngka.
U la iathuh ruh ba, La rai ruh ba lada u juh u Ophisar u hap ban leit jingleit arsien, u dei ban aiti shuwa ia ka progress report lane ka kaiphod jong ka jingleit ba nyngkong bad da ka jinglah jong u ban aiti ia ka kaiphod kaba pynhun bad kaba pyni ia u soh.
Ha dien kata yn sa lah ban ai jingbit ba un leit biang ha ka sien ka ba bud, nalaor kata u la bynrap ruh da kaba u la ong, ba la shim rai ruh ba ka Sorkar ka lah ban bei pisa tang kawei ka jingleit bad ia ka sien kaba ar yn hap ban bei da ka Sorkar India lane kino kino ki Agency ba nabar ri.
Haba jubab ia ki jingkylli kylli sha ki nongthohkhubor, u Bah Paul Lyngdoh u la ong, Ka mat hi ka long ba ka don ka jingkyrpad na baroh bad ki jingleit donkam shabar jong ki Ophisar bapher bapher ia kaba hap ban ioh jingbit na u Myntri Rangbah ka Jylla.
Hynrei mynta ka Sorkar ka la rai ban da pynshong nongrim bha ia kum kine ki jingleit, ban pynduna ia ka jingleit shabar-ri tang arsien bad ruh ban aiti ia ki kaiphod khnang ba kan ym don shuh ka jingpynsyrwa kai ia ka pisa paidbah.
