Shillong Nohprah 04: – “U Briew uba shu sngap ia ka Ktien U Blei, hynrei um leh ia ka, u long kum u briew uba peit ia ka dur ka dar ha ka Iitkhmih” Jakob: 1: 23, kane ka long ka phang pdeng ha ka Dorbar Pyllun kaba VII jong ka Synjuk ka Seng Kynthei Katholik Shillong Archdiocese kaba kila ia kren ha ka jingialang kaba la long ha Shnat Niam Epiphany Mawbri, Zone VII ha ka 3/12/2023 kaba dei ka sngi u Blei.
Ia ka dorbar pyllun da ki phew hajar ngut ki long kmie bad ki samla na 7 tylli ki Zone ka East Khasi bad Ribhoi District kane ka jingilang kala long ar sngi, ha ka jingialang kila shim ia ka rai ban tuklar ban rat diengkhong ia ka shongkha khynnah bad hapdeng jingduk ha ka jinglong mynsiem ban wanrah noh ia ka spah mynisem kaba hok da ka jingtrei shitom kaba hok bad ka jinglehbha ia ka imlang ka sahlang da ka Saindur jong U Blei.
Ha ki ar sngi ki prokram ba la long ki long kmie kila ioh shibun ki jingmyntoi na ki nongkren, da katei ka mat phang pdeng ki long kmie ki la puson bad shim rai ban pyntrei ha ki balang shnong ki shnat niam, haduh ka synjuk; ia kane la rai la shim ha ka sngi kut jong ka dorbar.
Ha ka tei ka Dorbar tlang u Most. Archbishop Victor Lyngdoh ka Shillong Archdiocese u long u kongsan ban tyrwa ia ka nguh ka dem Blei ha ka jingiasynran u Nongsharai Rangbah ka Shnat Niam Epiphany Mawbri u Sohblei Balenstine Marbaniang , u Sohblei Alfred L. Nongbri Spiritual Director ka Synjuk ki Seng Kynthei Katholik Shillong Archdiocese, bad kiwei pat ki Lyngdoh sohblei. .
Ha ka sneng ka kraw jong u Lyngdoh u la khot u la wer ia ki long kmie ban seng ban duwai ia ka iing ka sem kaba janai da ka jingieid ban don ka jingpynkylla ia ka pyrthei da ka jingim kaba janai bad kaba skhem.
Haba sot na ka jingthoh Bakhuid ka Shithi U Jakob kaba la phang pdeng ha kane ka lympung u la ong namar ba ki kynthei jong ka Jaid bynriew hynniew trep ki long kiba kyrpang bad ba ai jaka ba hakhmat eh ia ki rangbah shuh shuh ha kane ka jingialang ka rai ba ki la shim ka long.
Hadien nguh ka dem Blei ka Synjuk ka la pynkup burom ia ki Long kmie ne nongtrei balang kiba la long ki soh jong ka len lade na ka bynta ban wanrah ia ka jingshai jong ka ktien U Blei ha ki shnong ki thaw ia kaba la pynkup burom da u Spiritual Director ka Zone VII u Sohblei Kaldinus Majaw.
Ha ka Por shiteng sngi ka la don ka jingialang ba la pyniaid da ka synjuk ha ka jingialam jong u Sohblei Kaldinus Majaw Spiritual Director Zone VII kum u kongsan ban ai jingkyrkhu, shuh shuh ha katei ka lympung dorbar tlang la pynhiar ia ka Lama da u Spiritual Director.
Ka jingpynbna ia ka Dorbar Pyllun kaba ban sa long ha u snem ban wan kan leit sha Shnat Niam St. Paul Upper Shillong , Zone I katba ia jaka ban pynlong yn sa pynbna hadien. Hapdeng ka jingialang paidbah na ka liang ka synjuk ka la ai ia ka kaiphot treikam jong ka Synjuk bad pynkut da ka jingrwai Anthem ka Seng.
