Shillong, Jymmang 06: Mynta ka sngi ka kynhun Border Roads Organisation (BRO) kala rakhe ia ka jingdap 61 snem jong ka naduh bala seng ia bad ka ophis jong kane ka kynhun ka don ha Nongmensong Shillong bad ka long ruh shibynta ban rakhe ba ka Ri India kan sa dap 75 snem jong ka jingioh laitluid.
U Chief Engineer jong ka BRO u P K Baruah u la khaweh ia ka lama ban sdang ia kane ka jingiamareh ki bike na Shillong sha Guwahati bad ka jingthmu jong kane ka jingpynmareh ia ki bike ka long ban pynsngewthuh ia ki briew ba ki dei ban husiar ban ioh ia ka jingshngian haba niah kali ha surok.
Kane ka jingpynlong ia kane ka jingpynmareh bike ka long ruh ban pynphriang ia ka khubor sha ki paidbah nongshong shnong ba dei ban phikir da kaba but ryntih ia ki kyndon ha kaba ia dei bad kane ka khlam COVID-19 namar kane ka dei ka por kaba khim.
Kiba ia shim bynta ha kane ka jingiamareh bike na Shillong sha Guwahti ki kynthup u wei u ophisar, lai ngut ki ophisar ba kham hapoh bad kine kin iaid na Meghalaya sha Assam bad kin pynkut ha ka ophis jong ki kaba don ka Jhalukbari, Guwahati ha kaba u P K H Singh, VSM, Addl DGBR un pdiang burom ia ki.
Ka BRO ka dei tang maka ka kynhun kaba trei na ka bynta ki kam wat bniah ha kaba ia dei bad ka jingshna ia ki surok bad kane ka ophis ka don ha Shillong bad kane ka kynhun kala pyntrei shibun ki surok, ki surok krem da kaba pyndon kam ia ki kor ki bor kiba katkum kane ka juk ba mynta.
