Shillong, Jylliew 26: Ka khadsawphra College Mariang West Khasi Hills District mynta ka sngi kala pynlong ia ka jingrakhe ia ka Fourth Yoga International Day ha poh mynshem jong ka college, ha kaba ki samla pule jong kane ka college kila shim bynta da ka jingshirehem.
Ia kane ka Yoga la ialam da ka Vice Principal jong ka College ka kong Aida C War, ha ryngkat ki jingbatai ia ki jingmyntoi kiba lah ban ioh da kane ka jingleh ia ka Yoga. Ha ka jingiadon lang u Principal jong ka College u Bah Boldness Lyngdoh Nongum, ka jingpynlong ia ka Yoga ka long katkum ka jingbethah jong ka ophis jong u Deputy Commissioner jong ka West Khasi Hills District ban rakhe ia kane ka sngi.
Na ka liang jong ka Ophis jong u Deputy Commissioner jong ka West KHasi Hills u la bethah ia ki khynnah ba kin wan ban ia shim bynta ha ka Yago kaba yn sa pynlong ha Nongstoin hynrei na ka liang jong ka College kala pynlong hapoh college.
Ha kine ki khyndiat sngi la plie ruh ia ka kamram jong ki nonghikai da u principal jong kane ka College ha ka jingiadon lang ki nonghikai bad ki dkhot jong ka Managing Committee. Ha kane ka sngi ka long ruh ka sngi jong ka jingdap shisnem ia ka jingplie ia ka Degree Course ha kane ka College.
Kane ka kamra jong ki nonghikai ka long kaba la bit la biang ha kaba la shna ha kata ka rukom baroh ki nonghikai kin ioh ban shong ha la ka jong ka jong ka miej ryngkat ka jaka trei kam jong ki kum ki Duli ban buh ia ki kot ki sla jong ki nonghikai.
