Shillong, Jylliew 19: Ka synjuk ki Rangbah 
Shnong jong ka thain Sawsymper hynne ka sngi kila leit ban kyrpad ia u Minister jong ka koit ka khiah u Bah AL Hek na ka bynta ban kyntiew kyrdan noh ia ka Langsymphud Sub-Centre ha Sawsynper sha ka Public Health Centre (PHC).
Ha katei ka jingia kynduh jong ka synjuk ki rangbah shnong jong ka thain Sawsymper ia u Bah Hek hapoh ka ophis trei kam jong u kaba don ha Club la synran lang ruh ia kine ki nongialam shnong da u MLA jong ka Mawsynram u Bah HM Shangpliang bad ha kane ka jingiakynduh kila aiti ruh ia ka dorkhas.
Katkum ka dorkhas kaba kila aiti kila ong ba ka Sawsymper kala dei hok na ka bynta ban kyntiew kyrdan ia ka Sub-Centre sha ka Public Health Centre kum shi bynta ban pynurlong ia ka jingthrang jong ka sorkar jylla ban kyntiew ia ka koit ka khiah bad ruh ban ai ka jingshakri kaba janai ha ki thain nongkyndong.
Kila kdew ruh ba ki shnong kiba don ha kane ka thain Sawsymper ki don haduh 24 tylli kumjuh ruh ia ki shnong kiba don marjan bad kila pyntip ruh ka jingdon jong ki paidbah nongshong shong shnong ki don kumba 20 hajar tam katkum ka khana samari jong u snem 2011.
Naduh u snem 1992 kumba la iathuh da u Rangbah Shnong la ioh ia ka PHC hynrei tang na ka daw ba leh politic mano re mano ngi lah duh noh ia kane ka PHC ong u Bah Hek
“Na ka bynta ka roi ka par ngi dei ban klet noh ia ka politic bad kano kano ka development kaba wan ha kano kano ka jaka ha kano kano ka shong klet noh ia ka politic bad lada wanrah ia ka politic ha kata ka por bad kam dei tang ka jingduh nong hynrei kan dei ka jingtip ia ngi baroh’ ong u Bah Hek.
Lah 25 ne 26 snem la shu duh ei ia kane ka PHC tang namar ba don kiba leh politic bad kane ka wanrah pat ia ka jingjynjar kaba khraw bha namar ba lada phin leit sha Mawsynram CHC ruh ka jngai kumjuh ruh lada phi leit sha Mawkyrwat ne ha Mawphlang phin ym lah ban poi ha ka por kaba biang ban ioh ia ka jingsumar.
Na ka liang jong nga shimet bad kum u Helath Minister haba ngi theh ia kano kano ka kam pynroi ngi leh na ka bynta ka jngbha jong u paidbah bad ngam ju leh politic bad ia kane ka jingkyrpad ka jong phi na ka bynta ban kyntiew kyrdan noh sha ka PHC ngan ong ha phi ba ngan buh ia kane ka mat ha khmat eh ong u Bah Hek.
Shuh shuh kam dei ban shu kut noh tang hangne hynrei phi hap ban ia buddien bad ka shnong kadei ban don lypa ka jaka bad lada phi la ioh lypa ia ka jaka te ka lah suk bad ka jingdon jong ki paidbah nongshong shnong kala palat ia ka 20 hajar tam kala pynsuk bad ngin ia trei lang ryngkat ryngkat na ka bynta ban pynurlong ia kane ka kam khamtam lei lei na ka bynta ka koit ka khiah.
Bah Suly Lyngdoh uba dei u Cahirman jong ka Synjuk ki Rangbah ka jingia kynduh ka long kaba sei soh bad kaba don ia ka jingkyrmen namar ba na ka liang jong u Minister jong ka Health u la kular ba un buh ia ka thong ba ha khmat eh ia kane ka jingdawa ka jong ngi ban kyntiew kyndan noh ia ka sub centre sha ka PHC hapoh jong ka thain Sawsymper kaba don haduh 16 tylli ki shnong bad ki shnong ba marjan ruh ki ia trei lang bad kyrshan lang ia kane ka jngdawa jong ngi.
Na ka liang jong u Minister u la ong ba un shim khia bha halor kane kane ka kam bad u la bthah ia ngi ha ryngkat bad u MLA ba ngin ia bud dien na ka bynta ka pynsted ia ka kam khnang ban ioh sanction kloi ban tei ka PHC.
Ha u snem 2008-09 lah dawa halor kane hynrei ha u snem 2012-13 ngi la ioh ia ka Sub Centre bad mynta pat ngi dawa ba la kumno kumno bal ah dei ban kyntiew kyrdan noh ia kane sha ka PHC.
