Shillong, Jymmang 14: U Bah Process T Sawkmie ba dei u nongbat shabuk jong ka liang pyrshah hapoh ka iing dorbar thawain ka jylla mynta ka sngi u la leit ban jurip ia ka bynta kaba lai jong ka Greater Shillong Water Supply Scheme (GSWS) ban lap ia ka daw jong ka jingslem ban pyndep ia kane ka jingtrei.
Ha kane ka jingleit jurip jong u Bah Process na ka liang jong u Bah B L Lawai Executive Engineer jong ka tnad Electrical, u la phla ha khmat jong u tei u MLA ba ka daw jong ka jingslem ki don lai tylli, kaba nyngkong ka long ba ki shipai kim ai jaka ban pyniaid ia u piad um ha Riblong Mesum ban iaid sha Shillong ka surok.
Kawei ka jingeh pat ka long ka jingbym ioh jaka ha Lad Mawreng, ki trai jaka ki dang ai mynta shitiaiew ei ei ia ka jaka bad ka jingtrei kala sdang ha kaba la ialam ia u MLA ha kane ka jaka ba la sdang ban pyntrei mynta.
Kaba lai ka long ka jingslem ban ioh ia ka NOC na ka tnad PHE ha kaba ia dei bad ka top jaka pump um kaba ka kompeni kaba shna ia ka la lah ban pyndep ha Pung Umiew, haba ia dei bad kane ruh dang ha ka 7 tarik mynta u bnai ka PHE kala ai ia ka NOC.
Na kitei ki lai tylli ki jingeh kiba la long ki daw ban pynslem ia ka jingtrei jong ka GSWS, ar tylli na ki la lah ban pynbeit, ki trai jaka kila ai ban iaid u paid um ha Lad Mawreng, ka PHE kala ai ia ka NOC ha kaba ia dei bad ka top um ban pump ia ka um kaba shah mynta dei ka jingbit na ki shipai.
La iathuh ba na ka liang jong ka sorkar kala dep ban phah ia ki kot ki sla sha ka tnad kam poh iing jong ka sorkar pdeng hynrei kane ka kam kala sah teng mynta la shisnem shiteng, na ka liang jong tnad PHE mynta kala pynkhreh ban ai biang ia ki kot ki sla ha ka tnad kam poh iing ban ioh ia ka jingbit ban iaid ki pipe um na ki jaka jong ki shipai.
