New Delhi, Nohprah 03: Ka President jong ka ri, Droupadi Murmu ka la sam ia ki khusnam na ka bynta ka jingpynkupbor ia ki briew kiba don jingduna ha ki dkhot met jong u snem 2024 ha New Delhi mynta ka sngi (ka 3 tarik Nohprah, 2024) ha ka jingrakhe ia ka International Day of Persons with Disabilities.
Ha ka jingai jingkren ha ka jingialang, ka President ka la ai khubleiia baroh ki nongjop khusnam. Ka la ong ba kine ki khusnam ki don ka bynta kaba heh ha ka imlang sahlang. Da kaba bud ia kine, kiwei kiwei ki briew bad ki kynhun ki lah ban jam shaphrang ban pynkup bor ia ki briew kiba don jing duna ha ki dkhot met.
Haba kren shaphang ka phangpdeng jong ka International Day of Persons with Disabilities mynta u snem ‘Amplifying the leadership of persons with disabilities for an inclusive and sustainable future’, ka President ka la ong ka jingkyntiew ia ka jingseng kam lajong hapdeng ki briew kiba don jing duna ha ki dkhot met.
Ka jingkyntiew ia ki sap treikam jong ki, ka jingplie lad ioh kam, ka jingthied ia ki tiar jong ki, bad ka jingplie ki lad ban pyniaid iew ia ki mar jong ki kan pyniar shuh shuh ia ka sap long nongialam jong ki.
Ka President ka la ong ba ki briew baroh kidei ban pynthikna ba ki briew kiba don jing duna ha ki dkhot met ki shongsuk bad ki ryntih ka kyrdan. Ka jingwanrahia ka jinglong jingman kaba lait na ki jingwitkadei ban long ka bynta ba kongsan ha ka imlang sahlang.
Dei tang kum kane ka jait imlang sahlang ha kaba ki briew kiba don jing duna ha ki dkhot met ki ioh iakijuh ki jingshakri bad ki lad kaba ngi lah ban ong ba kadei kaba don ka jingsngewlem.
Ka President ka la ong ba ka jing duna ha ki dkhot met kam dei ka jing duna.Kadei ka jinglong kaba kyrpang. Ki briew kiba don jing duna ha ki dkhot met ki donkam ia ka jingsngewlem, ym ia ka jingisynei,ki donkam ia ka jingsngewlem, ym ka jinglehbha. Ka imlang sahlang kadei ban pynthikna ba ki mad ia ka jinglong ryntih, ka burom bad kiwei ki dkhot ha ka imlang sahlang.
