Shillong, Rymphang 12: U Myntri Rangbah Duh, Narendra Modi mynta ka sngi u la sam palat 1 lak tylli ki shithi thung kam sha kito kiba ioh kam thymmai lyngba ka video conferencing.
U la buh ruh ia u maw nongrim jong ka bynta kaba nyngkong jong ka Integrated Complex “Karmayogi Bhavan” ha New Delhi. Kane ka jaka kan kyntiew ia ka jingiatreilang hapdeng ki rishot bapher bapher jong ka Mission Karmayogi.
Ha ka jingai jingkren jong u, u Myntri Rangbah Duh u la ong ba la ai ia ki shithi thung kam sha palat 1 lak ngut ki briew kiba ioh kam bad u la kitbokkitrwiang ia ki bad ki longiing jong ki ha kane ka sngi. U la ong ba kane ka prokram ban ai ki lad ioh kam ia ki samla ha ka Sorkar India ka dang iaidshakhmat.
U la ong ba ka jingpynslem ban ai jingtip shaphang ka jingthung kam bad ka jingai ia ki shithi thung kam ka la ialam sha ka jingbam sap bad u la ong ba kane ka Sorkar mynta ka la pyniaid beit ia ka rukom treikam bad ka pyndep ruh ia ka jingthung kam ha ka por ba la buh.
U Myntri Rangbah Duh u la ong ba kane ka Sorkar mynta, ha kine ki 10 snem ba la dep ka la ai kam 1.5 shah ia ki samla haba ianujor bad ki Sorkar mynshuwa.
U Myntri Rangbah Duh u la kren ruh shaphang ka jingbuhnongrimia ka Phase I jong ka Integrated Complex ‘KarmayogiBhavan’ ha New Delhi ha kaba u la ong ba kane kan pynkhlain ia ki sienjam jong ka Sorkar ban pyntbit ia ki briew.
U Myntri Khynnah ka Tnat Kam Pule Puthi, Dr SubhasSarkaru la iashim bynta ha ka RozgarMelaha Shillong ha kaba u la sam ia ki shithi thung kam sha ki samla ba ioh kam thymmai hadien ka jingai jingkren u Myntri Rangbah Duh.
Ha Shillong, la sam ia ki shithi thung kam sha 48 ngut ki briew kiba na ka North Eastern Hill University, North Eastern Police Academy, Employees Provident Fund Organisation, NEEPCO, NEIGRIHMS badka TnatIing Dak.
U Myntri u la ong ba u dap da ka jingkmen shaphang ka jingpynlong ia ka RozgarMela da kaba bynrap, “U Myntri Rangbah Duh jong ngi, Narendra Modi Ji u la sdang ia ka “RozgarMela –ka jingthung kam na ka bynta 10 lak ngut ki briew. La shim ia ka sienjam kaba heh ban plie ki lad ioh kam na ka bynta ki samla bad pynthikna ka bha ka miat jong ki nongshong shnong”.
U Dr.Sarkar u la ong ba ka RozgarMelaka dei sa kawei pat na ki sienjam kiba bun jong ka Sorkar Pdeng bad u la ong ruh ba la khmih lynti ba ka jingthung kam kan pyndap ia ka jingthung haduh 10 lak ki kam bad la khmih lynti ruh ba kan wanrah ia ka jingioh kam shuh shuh ha ki kam shimet bad ki kam Sorkar.
U Myntri u la kdew sha ka jingseisoh jong ka KarmayogiPrarambh module ba la pliepaidbah da u Myntri Rangbah Duh, Narendra Modi, da kaba ong ba ka module ka kynthup ia ki code of conduct na ka bynta ki nongtrei Sorkar, ki rukom ba dei ban bud ha ka jingtrei bad ki polisi HR jong ka Sorkar ki ban iarap ia ki ba kin sngewthuh bad rung ha ki kam ba ki la ioh.
“Nga kwah ban ong ruh ba ka Tnat Personnel and Training (DoP&T) ka la pliepaidbah ia ka Mobile Application jong karynsan iGOTKarmayogika ban pynsuk ban pyndonkam ia ka rynsan Karmayogi’, la ong u Myntri.
Ha kaba iadei bad ki jingkylla ba la wanrah ha ki kam Sorkar, u Dr Sarkar u la ong ba ha ryngkat ka jingthung kam kaba bun, ka la don ruh ka jingpeit bniah ia ka jingkyntiew kyrdan ha ka por ba dei ia baroh ki ophisar kiba trei ha ki kynhun bapher bapher jong ka Sorkar. Namar kane, ki jingkyntiew kyrdan ki dang jia ha baroh ki kyrdan bad namar kane ki mih ki jingthylli ha ki post na ka por sha ka por, u la ong.
U la kitbokkitrwiangia ki samla kiba ioh kam thymmai bad u la ong, “Nga ngeit skhem ba phi kiba ioh kam thymmai phiniadon bynta ha ka jingtei ia ka India kaba thymmai lyngba ki jingmut jingpyrkhat kiba thymmai, ka teknoloji bad ka jingiashim bynta ki paidbah. Nga kwah ban ong ruh ba phi ai mynsiem ia kiwei kiwei ba kin ieng skhem ban pynurlong ia ki jingthrang jong ki.
” U la ong shuh shuh, “Ka Sorkar jong ngi ka ieng skhem ban wanrah ia ki rukom treikam ba thymmai bad ki polisi ban thaw ia ka India kaba lah ban pyndap ia la ki jingdonkam. Nga ai jingsngewnguh ruh ia baroh ki ophisar na ki Tnat bapher bapher kiba iadon lang hangne”.
Ka Natasha Manners na Meghalaya, ha ka jingiakren bad u Myntri ka la ong ba ka sngewnguh ia u Myntri Rangbah Duh, Narendra Modi bad ka la ong ba ka khmih lynti ban don shuh shuh ki lad bad ki jingiarap na ka bynta ka thain na ka Sorkar Pdeng ha ki por ban wan. Ka la kyntu ia ki samla na Meghalaya ba kin thep kam Sorkar Pdeng. Ka Natasha ka la ioh kam ha NEIGRIHMS.
