Shillong, Jylliew 06: U Myntri Rangbah ka sorkar Jylla hynne ka sngi Ba-ar, u la sam ia ki cheque sha ki Nongialam Shnong bad ki riew shimet ka Ri-lum Khasi, Jaintia bad Ri-Bhoi District kaba dei jong ka skhim Payment for Ecosystem Services (PES) kaba hap hapoh ka Green Meghalaya Mission.
Ka Payment for Ecosystem Services (PES) ka dei ka skhim kaba iarap da ka song pisa sha ki Shnong ki thaw, ki Kur bad ki riew shimet kiba mih ban pynneh pynsah bad pynrben ia ki khlaw ki btap kiba don ha Jylla Meghalaya. Ia kine ki cheque u myntri rangbah ka jylla u la sam ha ka jingrakhe ia ka World Environment Day, 2023 ba la pynlong ha State Convention Centre Shillong.
Ha kane ka sngi U Myntri Rangbah ka Jylla ula iashimbynta ha ka jingrakhe ia kane ka sngi pynneh mariang hapoh Nongbah Shillong ha ryngkat bad ki smala pule, ki Dorbar Shnong bad ki kynhun bapher bapher ba la wan ban iashimbynta.
U Conrad haba kynthoh hapoh ka Twitter ula ong “Ka thong jong ka jingiada bad sumar ia ka mei mariang jong ngi ka iaid tawiar bad ka jingpyrshang jong baroh ki riew shimet ha ka ban wanrah ia ka jingkylla.
Ka Meghalaya ka la sakhi ia ka jingkhih paidbah ba la iasnohkti lang da ki Shnong ki Thaw ban leh eiei ha ki kyrdan bapher bapher ha kaban wanrah biang ia ka jingitynnad bad jingkhuid jong ka Jylla jong ngi”
