Shillong, Nohprah 23: Sa tang arphew saw kynta ki paidbah riew ngeit Khristan kin sa pdiang burom ia ka jingleh kmen kaba khraw ban kynmaw burom ia ka jingkha ia u trai Jisu sha kane ka sla pyrthei myn ar hajar snem mynshuwa.
Mynta u snem ka jingrakhe ia kane ka jingpynkhreh ban rakhe ia kane ka Khristmas kala kham long kaba kham shong shit bha ha kaba bun ki balang kila pynlong ia ka jingiaid karol ha kylleng ym tang ha kane ka nongbah Shillong hynrei wat sha ki nongkyndong ruh kum juh.
Ki balang kila pynphuh ia ki iing mane jong ki da ki light kiba bun rong bad kum juh ki riew shimet kila wah ia ki khlur bad kum juh da ka jingpynkhreh ia u dieng Khriatmas ha ki iing ki sem ka jong ki da kaba pynphuh ia ki ki light ba bun rong.
Na ka liang jong ka sorkar ruh ha kane ka snem kaba mynta kala pynphuh ia ki surok kiba kham kongsan kum ka GS Road na Motphran sha Kashari, sha Laitumkhrah bad kahtam eh ia ka Khyndai Lat ka pdeng jong kane ka nongbah Shillong ha kaba da ki hajar ki paidbah ki tuid sha kane ka jaka ban peit kai ia ka light.
