Shillong, Lber 22: U Myntri Rangbah ka jylla u Conrad K Sangma haba jubab ia ka jignkylli jong u bah Charles Pyngrope la ong ba ka sorkar kam shym don katta ka jingthmu ban bthah ia ki skul ba kin pyniaid ia ki skul Bus.
U myntri rangbah ka jylla la ong ba ka sorkar jylla kala mang pisa T.11.30 klur ban thied ia ki kali ba ngaim ban shong laiphew ngut, ia kaba la dep ban thied 30 tylli ha ka jinglut kaba T.17 lak tyngka.
Haba jubab ia ki jingkylli bynrap na ka liang jong u myntri rangbah la ong ba bun na ki skul kim treh ban pyniaid ia ki Bus skul, dei na kane ka daw ba la hap ban ai noh sha ki kynhun ban pyniaid ia ki Bus.
La iathuh ba shuwa ban leh ia kane ka sorkar kala ia mir jingmut bad ki paidbah, ki nongpyniaid skul, hynrei bun na ki skul ki pynpaw ba kim treh ban pyniaid namar ba ki shem jingeh, hynrei ban pynlait ia ka jingkhap ngiah ka sorkar kala sdang ia kane skhim.
Kane ka skhim ha kane ka jingsdang la pynkhreh tang na ka bynta ka nongbah Shillong, namar tang ha ki thain Laitumkhrah ki khynnah skul ki don haduh 27000 ngut bad na kitei 60% ki kali kiba leit buh skul dei jong ki riew shimet.
Ha ka juh ka por la iathuh ba kila don 15 tylli ki skul kiba la iasoi ia ka soskular ban pyniaid ia ki Bus haduh mynta, kine ki bus ki long kiba shngian namar ki don ia ki CCTV kamera bad ia ka GPS ba ki kmie ki kpa ki lah ban tip haei ki khun jong ki kila poi.
Na ka liang jong ka sorkar kan shim ia ka jingai jingmut jong ki dkhot ka iing dorbar ban pyntrei kam sha kiwei ki jaka sor ha kane ka jylla, hynrei kin peit nyngkong ha kane ka nongbah Shillong kumno kan treikam.
Ia mynta ia kane ka skhim ym pat lah ban pyntrei kam sha kiwei ki bynta jong ka jylla, hynrei ki MLA lyngba ka skhim MLA ki lah ban thied Bus ban ai sha ki skul ban kit ia ki khynnah skul.
