Shillong, Naitung 06: Mynta ka sngi sa shisien ban pynpaw sha ka sorkar ba ka jylla ka don kam ia ka jiingpyntrei kam ia ka Inner Line Permit, ka seng kala pynieng ia ka khyrdop ban khynra ia ki nongleit nongwan kiba na bar ka kylla ha 20 mer ha Ri Bhoi District.
Kane ka long ruh ka khubor sha ka sorkar ba ka jingdawa ban pyntrei kam ia ka ILP ka dang iai bteng bad ka long ba ka sorkar kam ban sngap mynthi ha kaba ia dei bad ane ka jingdawa ban pyntrei kam ia ka ILP ha kane ka jylla Meghalaya.
U President ka KSU u samla Lambokstarwell la ong ba katei ka khyrdop Infiltration kaba don ha Byrnihat ka dei tang ka shynrong, namar kiba don ha katto ka jaka ha ka por miet ki shu buh da ki tohslait, kim juh kylli kot kylli sla bad katno ngut ki don ki briew, ka seng kam kynnoh ia kito kiba don ha katta jaka hynrei ki kynnoh ia ka sorkar.
U President ka KSU seng kmie la long sa katno tylli ki snem kin dang iai ap ba ka sorkar kan pyntrei kam ia ka MRSSA, la ong ba kane ka dei tang ka jingsdang kaei kaba ka seng ka leh mynta ka sngi, la bthah ia baroh ki shnat treikam ba ka jingkhynra mynder kan ong ha baroh ha duh ki shnong ki thaw namar ngim lah shuh ban shusngap, ki bor sorkar kin sa ong wat shim ia ka ain ha kti.
Na ka liang jong u President ka KSU u la ong ba ka seng ka kwah ban kren shai ba kito kiba pyntrei ha ki kam bapher bapher kiba juh wanrah ia ki briew kiba na shabar, “ wat juh wanrah ia ki briew khlem biang ki kot ki sla, ngim ban se wat la u dei u para trai ne hynmen trai jong la jong ruh ka seng kan nym lah ban ia ia pein nangne sha khmat”, lada don kam ia ki briew ban pyntrei wanrah ia ki briew kiba biang ki kot ki sla iaid katkum ka Work Permit, ym ba phin iaia iaid burieh ne iaid mynmieit .
U samla Donal V Thabah haba kren sha ki lat pathai khubor, la ong ba kane ka jingbuh ia ka khyrdop ILP kam dei ka sien kaba nyngkong hynrei kane ka dei kaba lai bad kaba kila leh khatduh eh dei ba ka sorkar Assam ka pynbna ia ka National Register of Citizens.
Haba phai sha ki ain kumba la ia kren ha kane ka jylla Meghalaya ka don ka State Migrant Workment Amendment Act, 2011 ka don ia kane kala dei ka ain jong ka jylla hynrei kaba sngewsih ka long ba naduh 2011 haduh mynta haba ki leit ban khynra ha ki jaka trei ki briew kim juh don ia ka Workpermit, ki pynibeit tang ia ka Labour Laisen ne ki EPIC ki jong ki.
Na ka liang jong ki Kontraktor bad ki nongbylla lada kim don ia ka Workpermit kamut kila pynkhien ia kato ka ain, hynrei lada ka seng ka leit sha ka Labour department ban kylli ki ong kim tip ia kata ka ain, ka jingkylli kalong kumno kim ithuh ia kata ka ain haba kala dei ka ain jong ka sorkar jylla, buh jingkylli u general secretary ka KSU.
Ka Worpermit ka long kaba don kam namar ka pan ia ka syrnot kaba la pynshisha da ki pulit na katta ka jylla ia ka jinglong nongshong shong jong kin a kato ka jaka, kaba ar ka long ba ia kane ka jingai worpermit ka long na ka bynta 179 sngi bad da la kut kateika por hap ban pynthymmai.
Hynrei lada ki ioh tang ia ka labour laisen, ha dien ka 180 sngi ki pan ia ka dur thep vote bad ki kylla nongshong shnong noh, kane ka buh jingma ia ki trai shnong, nalor ba la long ki rit paid bad lada ki dang wan shidang wan sa long ki rit paidbah bad ioh kan poi ka khot sa duhnoh ruh ia ka bor synshar bad kan poi ka por ba duh lut, ka jingphah pynthymmai 179 ka long ban khanglat ia ki ban long trai shnong.
Kawei ka ain kaba la mih ha dien ka jingiakhih ki sengbhalang bad ki paibah ka dei ka Meghalaya Residence Safety and Security Act, 2016, kane ka ain kala mih namar ka jingeh ban ioh ia ka ILP namar hap ban ia kren bad ka sorkar pdeng.
Katba ym pat ioh ioh ia ka ILP,dei ban pyntrei kam shuwa ia kane ka ain, hynrei kaba sngewsih ka long ba haduh mynta ym pat buh ia ki District Taskforce bad kaba son mynta ka long tang kawei ka khyrdop jaka rung jaka mih, ha kane ka sngi ki dkhot ka seng kila don lang ha katei ka jaka ban khynrei ia ki nongleit nongwan.
