Shillong, Naiwieng 03: Mynta ka sngi ki paidbah nongshong shnong ka shnong Mawpen kaba hap hapoh jong ka Hima Bhowal kila wan tur sha KHADC ban pyrshah ia ka jingthung rangbah shnong ba shipor da u syiem jong ka Hima ban pynpaw ia ka jingpyrshah jong ki.
Haba kren ha ki lat ptahai khubor u bah Aibor Suna u wei na u dkhot jong ka dorbar barim u la iathuh ba ki nongshong shnong ki la wan ban ia kynduh ia u EM ba dei peit ia ka Elaka u bah Jambor War ban pynpaw ia ka jingpyrshah ha lor ka jingleh donbor u u Pa’iem Kynsai N Syiem ha ka ba u la thung sop sop ia u rangbah shnong shipor.
Ka daw jong ka jingpyrshah ki paidbah nongshong shnong ia u rangbah shnong ba shipor u bah Bikendro Kharbani ka long namar ba u Syiem ka Hima Bhowal u la thung sop sop khlem ka jingtip jong ka shnong bad kaba la kham pynbitar ka long ba la pan ia ki kot ki sla, ka rukom ka long ka jingaiti ia ki kot ka long ynda la thung ia u rangbah shnong ba pura.
U Bah Jambor War u la ong ba un sa shim khia ia kane ka jingjia bad ka jingkwah jong ki paidbah ka shnong Mawpen ba ki kwah ia u rangbah shnong ba pura bad kila pynpaw ia ka jingpyrshah jong ki ia u rangbah shnong ba shipor.
Ha kane ka sngi ki paidbah nongshong shnong kila wan lang bad kynthei bad shynrang ban ia kynduh ia u EM ba dei peit ia ki kam hima sima bad ha kane ka jingwan jong ki kila rah ruh ia ki pla kard ban pynpaw ia ka jingpyrshah jong ki kum ka shnong.
