Shillong, Nohprah 14: Ka kynhun jong ki muktiar na kane ka nongbah Shillong kaba kyntup lang ia kiba na ka jylla Nagaland bad Manipur kin mudui da ka Public Interest Litigation (PIL) sha Supreme Court pyrshah ia ka Citizenship Amendment Act bad kane ka jingmudui ka long ban weng noh ia katei ka ain.
U bah Peter A Dohkrud u muktiar na kane ka nongbah Shillong haba kren ha ki lad pathai khubor mynta ka sngi ha Shillong Press Club u la ong ba ia kane ka PIL kin thep la sngi nyngkong ka 16th Nohprah 2019 bad u ban leh ia kane u dei u Jose Abrahma muktiar jong ka Supreme Court. Mynta ka CAB, 2019, kala kylla CAA, 2019 ha dien ba la soi u president ka Ri India kala long ka ain.
Kane ka PIL, kan long ka jingiathep lang jong kiba bun ki muktiar kiba don ha kane ka nongbah Shillong kaba kyntup ia kiba na ka jylla Nagaland bad kum juh na ka jylla Manipur ia kane ka PIL. Ka jingdawa ha ka long ba dei ban weng noh ia kane ka ain CAA, 2019 namar ka pynkhein ia ka Riti synshar jong ka Ri, ia ka artitle 14, 15 bad 21.
La iathuh ba haduh mynta ka sngi kila don haduh khatar tylli ki PIL pyrshah ia ka CAA, 2019 kiba la thep hapoh Supreme Court bad na ka liang jong ki kin thep la sngi nyngkong. Ki don ka jingkyrmen ba ka Suprem Court kan weng ia katei ka ain kaba la pdiang da ki iing dorbar parliament bad ia kaba la ioh ia ka jingmynjur jong President ka Ri India.
Na ka liang jong kine ki muktiar ki kyntu ia ki paidbah jong ka thain shatei lam mihgni jong ka Ri india ba kin ai ka jingkyrshah ha kaba ia dei bad kane ka PIL bad ba kin duwai lem ba ki bor jong ka ain kin weng ia kane ka ain kaba long pyrshah ia ka riti synshar jong ka Ri India.
