Shillong Iaiong 15: Namar ka jingiai kuman bad long mynthi u Director ka North Eastern Indira Gandhi Regional Institute of Health and Medical Sciences (NEIGRIHMS), ka HYC mynta ka sngi kala leit ban aiti da ka dorkhas sha u MP ka Rajya Sabha u Dr WR Kharlukhi.
Kane ka jingleit ban ia kynduh ka HYC ia u MP ka Rajya Sabha ka long ban kyrpad ban buddien leh ha kaba iadei bad ka jingdawa ban thung ha NEIGRHIMS Hospital, Shillong.
U President ka HYC u Bah Roykupar Synrem haba kren sha ki lad pathai khubor hadien ka jingiakynduh ia u Dr WR Kharlukhi u la ong ba ka seng ka la buh shakhmat ia ki jingdawa, kata ka long ba dei ban thung 80% ia ki Nurse Kynthei bad 20% ia ki Nurse Shynrang, ha ka ba baroh ki tnad treikam jong ka sorkar India ba ki lah ban shim rai ban pyntreikam ia kata ka 80% la 20% kumno pat ha jylla jong ngi kim lah ban pyntreikam ia kane.
Ka seng ka la pyrshah jur ruh ia ka jingong u Director ka NEIGRHIMS, ba ym shem don ki tnad treikam jong ka sorkar India ban pyntreikam ia ka 80% lane 20%. Kumta mynta ka sngi ka seng ka la phah ka jingthoh sha u MP ka Raya Sabha ryngkat bad ki jingpynshisha ba baroh ki tnad treikam jong ka sorkar India ki la ban pyntreikam hynrei tang ha NEIGRHIMS ym lah ban pyntreikam ia kane ka 80% la 20%.
Ka seng ka ladep phah ia ki jingthoh sha u MP ka Lok Sabha u Dr.Ricky AJ Syngkon bad ia u MP ka Tura u Saleng Sangma ban shim khia ia kane ka kam bad ruh mynta ka sngi ki la iakynduh sa ia u MP ka Raya Sabha khamtam namar u dei u MP na ka party ba don ha ka Sorkar ba un kren ia kine ki mat ba ka seng ka la buh.
Ka jingbymkwah ban pyntreikam u Director ka NEIGRHIMS ia kane kadei namar ba lehse u kwah ban wanrah khambun shuh shuh ia ki Nurse Shynrang hapoh NEIGRHIMS Hospital kumba la jia ha kine ki snem ba ladep, la ong u bah Roykupar.
