Shillong, Lber 01: U Bah Strong Pillar Kharjana uba dei u MDC ka Mawkhar Pynthorumkhrah u la shah jied kum u Chairman ba thymmai jong ka KHADC hadien ba ym shem la don kiba ïakhun pyrshah bad u.
Haba pyniaid ia ka election ban jied ïa u Chairman ba thymmai jong ka Council, ka presiding officer kaba dei ruh ka DC jong ka EKHD ka kong RM Kurbah kala pyntip hapoh ka ïing dorbar ba namar ym don ba thep kyrteng nalor u Bah Strong Pillar Kharjana kumta la pynbna ia ka kyrteng jong u kum u Chairman ba thymmai jong ka Council.
Hadien ka jingpynbna u MDC ka Sohra u Bah Titos W Chyne bad u MDC ka Laitkroh – Langkyrdem u Bah Shemborlang Rynjah kila synran ia u ban leit shimti ia ka shuki Chairman.
Haba kren halor ka jingshah jied khlem jingiakhun u Bah Shemborlang u la ong ba kum ka kyrteng phin long u paia ba skhem ban pyniaid ia ka dorbar jong ka Council khlem da shah liang.
U MDC ka Sohra u Bah Titos W Chyne u la ai khublei ia u Chairman ba thymmai halor ka jingjop ba khlem ïakhun pyrshah bad kum ka kyrteng phin long u paia ba skhem bad ban ym dei ban don ka jingshai liang bad kitbok kitrwiang ban lah ban pyniaid ia ka iing ka ha rukom kaba dei.
Ka MDC na Nongpoh ka kong Rona Khymdeit kala pynpaw ba u Bah Kharjana u la thaw history ba kum u dkhot ba la shah jied ha ka sien ba nyngkong u la ioh ban shimti ia kane ka shuki bad ka jaitbynriew ka phai khmat sha kane ka iing da kaba phai khmat ha ka synshar ka khaddar bad ia ka khyndew ka shyiap.
Haba jubab halor kane u Chairman ba dang shah jied thymmai u Bah Strong Kharjana u la ong ba ki kpa tymmen ki la saindur ia ka riti dustur bad ka riti synshar ka ri kaba la ithuh ia kane bad kadei ha ngi ban pynneh pynsah bad ban pynjanai ia kane ka ïing ba don burom.
Shuh shuh u Bah Strong u la ong ia ki para dkhot ba kidei ban buh ia u paidbah ha khmat ba kin ioh ia kaei kaba phi leh hapoh kane ka ïing dorbar bad bynrap ruh ba to ai ngin long ka nuksa sha kiwei pat ki ADC jong ka ri.
Halor ka jingtip bad ka jingshem phang u Bah Strong Kharjana u la kyrpad ia ki dkhot jong ka ïing kiba la rim ba kin to ia lam lynti ia baroh ki dkhot kiba dang shu shah jied thymmai.
