Shillong, Naitung 13: Ki nongjop ha kane ka jingiakop shad “Hiphop” kaba la long mynta ka sngi ha Shillong, ki long u Anil Chetri na Meghalaya bad u ba la wan ba ar u dei u Techi Gromb na Arunachal Pradesh. Kine ar ngut ki mih khmat ia ka North East sha ka jingkop phainal ka ban long ha Mumbai ha u Nailur 2019.
Haba kren ha ki lad pathai khubor, kine ki ar ngut kiba la shah jied ha kane ka jingiakop, kila pynpaw ba kim shym don kano kano ka jingshah hikai kaba kyrpang hynrei ki don ka jingsngew tynnad ia kane ka rukom shad.
U Anil Chetri u ba la wan ba nyngkong u la ong ba u juh hikai shad ha iing bad ha dien ba u la tip ba ka don kane ka jingiakop shad u la ai kyrteng bad um shym poi pyrkhat ba poi sha ka jingjop u la ong ba un dang pynkhreh bha ia lade ban ia khun ha ka phainal ka ban long ha Mumbai.
Na ka liang jong u Techi Gromb na Arunachal Pradesh u la ong ba kane ka jingshad ka long kaba pawnam bha ha Shillong, haba u la ioh jingtip u la pan jingbit na ka kmie bad u kpa ban wan ia shim bynta ha kaba la synranlang ia u da u hynnmen.
U la ong ba kum kane ka jingshad ha Arunachal Pradesh kam don bad u la juh hikai hi ha la iing bad u dap da ka jingkmen ban shah jied ban leit mih khmat ia ka North East ha ka jingiakop ban long ha Mumbai mynta u snem.
Katba ha ka jingiakop shad Popping ia kane ka jingshad la jop da u Jatin Karbar na Guargoan, haba kren ha ki nongthoh khubor ula ong ba ia u la kha ha Shillong bad mynta kila sah ha Guargoan. Ka jingkynmaw jong u ia ka Shillong um lah ban klet dei na kane ka daw ba u la wan ban ia shim bynta.
U Sahpir Singh Director jong ka Ministry Dance, u la iathuh ba ka Shillong kam dei tang ka nongbah jong ki sur jingrwai, u kwah ban pynlong ruh ia kane ka nongbah Shillong kum ka nongbah ha ka shad.
