Shillong, Kyllalyngkot 15: Ka Federation Of Khasi Jaintia & Garo People (FKJGP) Central Body ka pynpaw ia ka jingsngewkhia halor ka jingpynslem jong ka Sorkar Kmie ban khot ia ka Sorkar Meghalaya khnang ban ai jingmynjur halor ka rai (resolution) ba la shim da ka ka Iing Dorbar Thaw-ain jong ka jylla ha ka 19 tarik Nohprah, 2019 ban pyntreikam ia ka Inner Line Permit (ILP) ha ka jylla.
Kane ka jingpynslem ka pyni ba ka Sorkar Kmie ka shim sting ia kane ka rai jong ka Iing Dorbar Thaw-ain ka jylla. Kumta halor kane, na ka liang ka FKJGP ka kyntu jur ia ka Sorkar Jylla ban bud dien mar-mar bad ka Sorkar Kmie khnang ba kane ka kam kan ym sahkut ha suin.
Ha kajuh ka por, ka FKJGP ka kyntu jur ia ka Sorkar Jylla ban pyntreikam noh mardor ia ka Meghalaya Residents Safety and Security Act (MRSSA), 2016 da kaba pyntreikam ia ki khyrdop talasi mynder (entry-exit points) ha ki khappud kaba long katkum ka Principal Act jong ka MRSSA 2016 bad ruh ban bthah (direct) ia ki District Task Force ban sdang noh ia ki kam jongki ha kaba iadei bad ka jingpyrkhing ia ka rung ka mih jong ki mynder ha baroh ki district ka jylla.
Ka FKJGP kan sa iamir jingmut lang bad ki para Sengbhalang kiba ju iatrei lang ryngkat bad kiba la ia duhthiah duhdem bad shah shitom ban pyn wandur ia ka Principal Act jong ka MRSSA 2016 ban shim ia ka rai kaba tyngeh lada ka sorkar jylla ka dang pynslem bad leh mutlop da kaba aidaw kumne bad kumtai ban pynieng ia kita ki khyrdop talasi mynder (entry-exit points).
Ka sorkar jylla kam dei shuh ban dang pynslem ia katei ka kam namar ban talasi mynder ha kita ki kyrdop ym donkam satia ia kita ki ing paki dulan namar wat ha ka jylla Manipur ruh mar sien pyntreikam ia ka ILP la lah ban tehlakam lyngba kita ki khyrdop kiba la shu tei malu mala namar ka jingkhlain jong ka ain ka shong haka jing shimkhia jong kita kiba pyn treikam ia ka ain.
Ka sorkar jylla Meghalaya kam dei shuh ban dang aidaw ia kata ka Amendment lane kata ka ordinance jong ka MRSSA 2016 hynrei dei ban nang pyntreikam beit mardor da ka Principal Act jong ka MRSSA 2016 kat bym pat ioh ia ka ILP lym kumta ka Seng bad kiwei pat ki para Sengbhalang kiba ju iatrei lang ryngkat kim banse ban pynieng hi ia kita ki khyrdop talasi mynder.
Ha kawei pat ka bynta, ka FKJGP ka pynrem jur ia ka jingkhot hajir da ki pulit ka Nongmynsong Police Outpost, Shillong ia u Bah Elton Cliff Warjri uba dei u Asst. Genl-Secy FKJGP Central Body tang na ka daw ba u don bynta ha ka jingpynshai paidbah ia ka jingdonkam ka ILP ha ka jylla bad kumjuh ruh ban pyrshah ia ka Citizenship (Amendment) Act.
Halor kane, ka FKJGP ka maham ia ki bor sorkar ban kham tyngkan bad ban ym pynklang ia ka ding lyngba kum kine ki jingleh kiba lah ban ialam sha kaei kaei ka bym sngewtynnad.
Ka seng ka sngew ba hapdeng kaba kum kane ka por ka sorkar kala dei ban kham pynleit jingmut ban bud dien ia kiba bun ki Issues bad ia kita ki resolution ba la shim da ka ka Iing Dorbar Thaw-ain jong ka jylla ban pynurlong ia ka jing angnud jong ki Piadbah.
Ka sorkar kam dei satia ban sdang da kaba pyntieng kohtympan iaki Nongialam jong ki Sengbhalang lyngba kita ki summon notice bad kumta ter ter namar kan nang pynbitar shuh shuh ia ki Dkhot jong ka seng kumta lada ka sorkar kam bthah mardor ia ka tnat pulit ban sangeh ka pyntieng pynsmiej ka sorkar hi kan hap shim ia ka jingkitkhlieh lada ki mih kino kino ki jingjia ki bym sngew tynnad. La ong u bah Wellbirth Rani President ka FKJGP seng kmien.
