Shillong, Naitung 22: Ka Federation of Khasi Jaintia and Garo People (FKJGP) mynta ka sngi ka 22 tarik u Naitung 2024,ha ryngkat ka jingia don lang jong ka Meghalaya Traders Fresh Vegetable and Ginger Association ki la leit ban pynsngew ha ka Myntri ba dei khmih ia ka kam rep kam riang jong ka Jylla ka Dr Ampareen Lyngdoh.
Ha kane ka jingiakynduh Kila dawa naka Sorkar Jylla ban pyntreikam noh daka ‘Road Delivery Challan’ ban pyllait iaki kali kit mar rep, naka jingshah khrong pisa beain ha ki weigh Bridge ha Umling Ri Bhoi District bad ha Ratachera, East Jaintia Hills District.
Haba ioh ban ia kren bad ki nongthoh khubor na ka liang u Chairman ka Agriculture Cell ka FKJGP Bah Brightstar Mawthoh ula iathuh ba ki don katto katne ki briew kiba lum khajna naki kali kit mar rep, ha kylleng ka surokbah ka Jylla (National Highway). U la ong ruh ba don ki kali mar rep, kiba shah pan pisa hapdeng T.500 haduh T.1500 shi kali.
U Bah Mawthoh u la ongruh ba ki don ki riew shim kabu, kiba bat iaki kali kit mar rep bad dawa siew pisa bad kine ki briew kila bat ia ki kali da ki bun bun kynta, bad ka pynslem iaki kali ban poi sha ki iew ki hat bad haka juh ka por, ka don ruh ba ki mar rep, ki kylla pyut noh.
U Bah Mawthoh u la ia thuhruh ba hakane ka jingialang u la kyntu iaka Myntri ban pyntreikam noh daka ‘Road Delivery Challan’ khnang ba ki kali kit mar rep, kin pyndonkam ia kine ki Challan ban lait naka jingshah khrong pisa beain.
U la ong ruh ba ka FKJGP lem bad ki Nongrep, kila kyntu iaka Myntri ban maramot iaki surok haki thain Lumshnong East Jaintia Hills khnang ban suk ka khaii mar rep shaki katei ka thain bad sha ka Jylla Assam.
U Bah Mawthoh ula ong ruh baka jingioh jingithuh ki ‘Road Delivery Challan’ naka Sorkar kan iarap iaka tnat ban tip, iaka jingdon ki Nongrep, ki mar rep ba pynmih ha Jylla bad kumjuh ruh ia ka jingdon ki marrep ba khaii shabar ka Jylla khamtam nangne na Rilum Khasi-Jaintia.
