Shillong, Iaiong 23: Ka jingkhie khyllep ka eriong ha ka miet sngi Balang kala pynjulor ia 101 tylli ki longiing ha ki 6 tylli ki shnong kiba hap hapoh jong ka Nongstoin C&RD Block West Khasi Hills District.
U MLA ka Nongstoin u bah Gabriel Wahlang u la iathuh ba ha kane ka jingshah lyngshop ha ka mariang ki don 6 tylli ki shnong kiba la shah ktah bad ki iing baroh kiba la shah pynjulor ki long 101 tylli.
La iathuh ba na kine ki 101 tylli ki iing kiba la shah ktah jubor bala bun ka jingshah pynjot ha ka eriong ki don 28 tylli bad ki iing kiba la shah pynjulor malu mala ki don 73 tylli, kine ki long kiba la ioh jingkhein haduh mynta ka sngi na ka liang ki ophisar ki dang bteng ban nang wad jingtip shuh shuh ioh lehse ki dang don kiba shah pynjulor.
Haba iadei bad ki lad ai jingiarap la iathuh ba na ka liang jong ka Block kala ialeh ban kyntiew ia ki iing kiba la shah pynjulor ha ka website bad ynda la dep kin sa ioh ia ka jingiarap katkum ka jingjulor na ka liang jong ki ophisar kila ialeh ban pynbiang hynrei namar ka jingthut jong ka light kala shim ia ka por bad khmih lynti ka jingiarap kan sa poi sha kiba dei hok ban ioh.
