Shillong Jylliew 27: Ka jingjur jong ka jingslap kaba la sdang naduh ka meit sngi thoh dieng haduh mynta ka sngi kala wan rah ia ka jingshlei um kaba jur bha ha ki thain Hat Mawdon ha kaba ki saw tylli ki shnong kila shah ktah, ka Hat Mawdon, Telsora, Ryngku bad ka Patakat.
Ha kane ka jingdap ka um sha ki shnong ki thaw, tang ki iing bad ki dukan kiba don hapoh ka Hat Mawdon kala palat ia ka 60 tylli, ka shnong ryngkut baroh kawei, ka shnong Patakat bad kum juh ka Telsora, la ong ba don shuh kiwei ruh ki shnong kiba la shah ha kane ka jingdap ka Um.
Kitei ki shnong kiba la kdew haneng kila shah ktah ha kane ka jingkiew jong ka Um na ka wah Khasiamara bad ki briew kila ia mih na ki iing ki sem ban lait na ka jingmynsaw. Kat haduh ba toh ia kane ka khubor ym shym la ioh ba kan don kano kano ka jingjia kaba sngewsih.
Haba kren ha u SP News Agency ki nongshong shnong katei ka thain kila iathuh ba ka surok kaba leit sha Hat Mawdon ha bun ki bynta kila twa naduh Nongtrai ter ter sha duh Lat Shella shuwa ban poi sha hat Mawdon.
Ki dukan kiba don ha Hat Mawdon ki tiar kiba don hapoh ki dukan kila jieh lut na kadaw jong ka jingkiew jong ka um, kat haduh ba thoh ia kane ka khubor la ong ba ka slap ka dang jur ba ka um kam shym la hiar hynrei ka dang neh kum juh.
Kine ki shnong ki long ha khappud bad ka Bangladesh ba kane ka jingshlei um kala ktah ia kitei ki paidbah nongshong shnong kane ka jingshlei ka um kala jia mynta ka sngi ha ka por step namar ka jingjur palat jong u slap.
