Shillong, Naiwieng 20: Ki samla pule ka North Eastern Hill University (NEHU) mynta ka sngi ka 20 tarik u Naiwieng 2024, kila rai ban pynsangeh noh shuwa shipor ia ka jingshah thngan, kaba la iaid mynta la 16 sngi.
Ia kane ka rai la pynbna da u President ka NEHU Students’ Union (NEHUSU) samla Sandy Sohtun ha ka jingiadonlang ki nongialam ka KSU-NEHU Unit, hakhmat ki samla pule ba iakhih, ki seng ki Nonghikai, ki Nongtrei ka NEHU bad kiwei kiwei.
Kat kum ka jingong jong u, kane ka rai ban pynsangeh shipor ia ka jingshah thngan ka dei kaba la shim hadien ka jingkyrpad jongki Nonghikai, ki nongtrei bad ki Doktor.
“Bad haba pynshong nongrim ia ki jingai jingmut ki doktor, ngi la iohi ia ka koit ka khiah jong ki samla ba shah thngan mynta la 16 sngi, kala shah ktah bha, kumta ngi ka NEHUSU bad KSU-NEHU Unit ngi la rai ban pynsangeh shipor ia kane ka jingshah thngan” ula ong.
Hynrei ula pynbna pat ba kane kam mut ba ka NEHUSU bad KSU-NEHU Unit kan pynkut noh ia ka jingiakhih. “Ngi iai bteng ia ka jingiakhih jong ngi ha ki sngi poh-ia naduh ka por 9 baje mynstep haduh 5 baje bad ngin nym mih na kane ka jaka tad haduh ban da pynurlong ia ki jingdawa jong ngi” ula bynrap.
Kane ka jingiakhih ka NEHUSU bad KSU-NEHU Unit kala sdang naduh ka 5 tarik Naiwieng haba dawa ia u Vice Chancellor Prof PS Shukla ba un hiar shuki noh nalor ban weng kam ia u Registrar bad Deputy Registrar.
Lah ban kdew, ka Ministry of Education ka Sorkar Pdeng, kala thung ia ka Inquiry Committee ki arngut ki Dkhot ban tohkit ia ki jingkynnoh pyniaid kam bakla bad jingbym nang pyniaid kam jong ki bor pyniaid ka NEHU, kiba long kat kum ka jingkynnoh jong ki samla pule.
U Vice Chancellor In-Charge Prof N Saha ruh ula thung ia ka Committee ban tohkit ia kine ki jingkynnoh haba pyntip ba ia ka kaiphod jingshen, yn sa aiti sha ka Inquiy Committee ka Ministry of Education ba kin leh ia kaba donkam.
Ha ka 19 tarik u Naiwieng 2024 na ka liang u Chief Secretary ka Jylla Bah DP Wahlang ha ryngkat ka DGP ka jylla ka kong Idashisha Nongrang ki la ioh ban leit jngoh ia kine ki khynnah bad na ka liang u Bah DP Wahlang CS u la kyrpad ia kine ki khynnah ba kin sangeh noh ia kane ka jingiakhih.
Kum ban shu pynkynmaw ba kine ki samla ki ba shong shahthngan ki ba kynthup na duh u President ka NEHUSU, u President ka KSU NEHU Unit lem bad kiwei kiwei pat ki para dkhot ki ba la ia shong shahthngan ki la hap ban shah sumar sha ki jaka ai jingsumar bad don ruh ki ba na kine ki samla ki la hap ban thiah ha poh ka Critical Care Unit(CCU).
“Ngin ap mynta ia kaei ka jingmih na ka kaiphod jong ka jingtohkit ka Inquiry Committee bad kaei kaba ka Ministry of Education ka leh. Lada ka Ministry kam rai kat kum ka jingdawa jong ngi, ngin sa pynsdang biang ia ka jingshah thngan” ula pynbna.
