Shillong, Jylliew 23: Ka Meghalaya bad Greate
r Shillong Progressive Hawkers bad Street Vendors Association (MGSPHSVA) ka seng ki Nongdie jingdie ha madan hynne ka sngi ka 23 June 2018 ka la pynlong ia ka jingrakhe ia ka lyngkhuh snem kaba ar ha Rympei ki Paidbah Hall, Pynthorumkhrah, Shillong.
La plie paidbah bad kyrkhu kyrdoh ia kane ka jingrakhe da u Myntri Rangbah ka Jylla U Conrad Sangma. U Myntri Rangbah U la ot ruh ia u cake kum ka dak ka jingrakhe ia kane ka sngi ba la seng ia ka seng ki nongdie jingdie madan ha ka snem 2016. Ki nongdie madan ki la pdiang sngewbha ia u Myntri Rangbah da kaba ai shi shang ki jhur bad ki soh kum ka dak ka jingburom ia ka jingiadon ryngkat jong u.
Ha kane ka sngi la pynlong ruh ia ka jingialang kut snem jong ka seng ki nongdie jingdie madan ha kaba palat 1300 ngut ki dkhot ki la poi ryntih bad ia shim bynta ha kaba iakren ia ki kam ba kongsan jong ka seng. La ai ruh ia ka report jingkhein jingdiah na ka bynta ka snem 2016-2017.
U Pastor Kyrsoibor Pyrtuh, dkhot ka TUR bad invitee member jong ka Seng ki nongdie jingdie madan ha ka jingkren jong u ong ba ki nongdie madan ki noh synniang shibun bah sha ka imlang sahlang bad khamtam eh sha ka ioh ka kot jong ka jylla. U la kdew ruh ba katkum ka jurip ki nongdie madan kiba don ha ka nongbah Shillong ki noh synniang hapdeng 12 bad 16 klur tyngka ha ka shibnai.
Ka Nongbah Shillong ka la nangsan bad nangheh nang iar bad shen ruh yn sa pynwandur thymmai ia ka kum ka smart city, kumta kum ki nongdie madan ngi don ka bynta kaba khraw ban ia shim bynta haba ai jingmut ia ki bor sorkar ba ha ka jingsain dur bathymmai, ka Nongbah Shillong ka dei ban long ka Nongbah jong ki paidbah, ki nongdie madan bad ruh ki rangli ki juki,
U Myntri Rangbah ha ka jingkren jong u kum u kongsan u la iaroh ia ka jingpyrshang ka seng ki nongdie jingdie ha madan ban kyntiew ia ki nongdie madan bad u ban khia ba ka Sorkar ka don ia ka jingangnud bad jingthmu ban trei na ka bynta ka bha ka miat jong baroh ki nongshong shnong bad ban wanrah ia ka roi ka par sha baroh.
Ha kajuh ka por u Myntri Rangbah u la pyllait khubor lyngba ka tweet hadien ba la wai ka jingialang bad u ong kumne “ Ba ka sorkar ka niewkor ia baroh ki nongshong shnong bad ka kut jingmut ruh ban trei shitom ban kyntiew bad iada ia ki hok jong ki nongshong shnong. Sa shisien u ai khublei ia ka Seng Ki nongdie jingdie madan.
