Shillong, Risaw 11: Mynta ka sngi u myntri rangbah ka jylla u Conrad K Sangma u la leit ban jngoh ia ka surok na Iew Wansing sha Dorrengre bad ha kane ka jingleit u la ia kynduh ruh ia ki paidbah bad u la ong ba ka dei hok ba ki paidbah kin ioh ia ka surok dei ban shna.
La ong ba ka surok na Dalu sha Gambegre ruh ka dei kaba jan sha Tura bad ka long kaba don kam ia ki paidbah kane ka thian bad kaba don kam ban shna ia kane ka surok na ka bynta ka jingbit jingbiang ki paidbah.
U myntri rangbah u la pynsngew ha kane ka jingialang bad ki paidbah ba ka PWD kala pynkhreh ia ka bynta ha kaba ia dei bad ka jinglut jongsep ban shna ia ka kane ka surok kaba 5.5 km, bad ka jinglut kan poi sha ka T.5.56 klur tyngka ia kaba yn sa sdang noh shen ban shna.
Ha kane ka sngi ki nongshong shnong kila pynsngew ruh ha u myntri rangbah ka jylla ia ka jinglong jingman jong ka Dispensary kaba don ha Chisakgre ha kaba kila ong ba la sdang ban shna sa kawei ka iing ha ka juh ka jaka ia kaba la pynpep noh mynta.
Ki paidbah kila kyrpad ia u myntri rangbah ba ka sorkar kan sdang ban pyntrei biang ia ka iing kaba la buh teng na ka bynta ka jingmyntoi ki paidbah ha ka koit ka khiah, haba ia dei bad ki sem iew u myntri rangbah la ong ba yn sa shna na ka skhim jong u myntri rangbah.
