Shillong, Risaw 11: Ka KSU ka pynpaw ïa ka jingsngew bynñiaw halor ka jing dkoh treikam jong ka tnad ka koit ka khiah hapoh ka district. Na ka por sha ka por ki paidbah ki ju ud ju nam halor ka jingbymbiang ka jaka sumar bad ki doktor hapoh CHC Mawkyrwat.
Kane ka CHC ka don ka jingduna ia ki nongtrei katkum ka jingdawa jong ka por bad kum juh wat ki jignthiah pang ruh ki duna palat hapoh jong kane ka jaka ai jingsumar jong ka sorkar kaba don ha Mawkyrwat.
Ka seng ka la ju lap mar ka por ïa ki paidbah ba wan shim dawai ki ba hap ban ap da ki kynta wat tang ban ïohi ïa ki doktor ruh bad kaba kum kane ka jia wat ha “emergency room” na ka bynta ki nongpang ba la kham jur ruh.
Kiba bun ki nong shong shnong ka District ki dei kiba duna ka ïoh ka kot bad kim kot bor ban leit shah sumar haduh ha shillong bad ka jingbymbiang kane ka jaka sumar ka wanrah jingeh ïa u kup shilliang sem shilliang bapli.
Kyllum lang hi ka daw halor ka jing thud treikam ka tnad sumar hapoh ka District ka dei na ka jingbymbiang wat ïa u khlieh ba dei peit ban pynïaid ïa ka. La jan shisnem ei ei kane ka tnad hapoh ka district kam don ïa u District Medical & Health Officer ba pura bad kane ka pyndkoh shibun eh watla ia kane ka mat la pynsngew teng ruh daka seng ha u Minister jong ka tnad ka koit ka khiah u bah A. L Hek bad ruh ha u Director of Health Services.
Kumta ha kaba ïadei bad kane ka jingmynthi jongka sorkar, ka seng ka phah da ka khubor ba tyngeh sha ka Sorkar ban thung mardor noh da u DMHO ba pura hapoh ka district lym kumta ka Seng kam banse ban shim da ka rai ba tyngeh.
Kum ban shu ban ruh ka seng ka sngew lyngngoh ruh halor ka jingslem ban pyndep bad pyntreikam noh ïa ka hospital 100 jingthiah wat hadien 8 snem ba la plie maw nongrim ïa ka.
Ka long kaei kaei ba sngewsih ba ki tnad sorkar bad ki nong mih khmat kim ïohi ïa kane ka jingeh bad kim shimkhia ban pynstet katkum ka jingdawa ka por. ” Ngi ai por shi taïew ïa ka sorkar ban thung mardor ïa u DMHO ba pura hapoh ka district lym kumta ka seng kan hap pyrkhat da kumwei pat.
Kane kam dei ka kam ban dang pynslem shuh shuh kumba ka long namarkata Wat lehkai khiewjakai ha kaba ïadei bad ka ïap ka im ki paidbah ba lui lui. ”Ka kyrwoh na u samla Pulljohn Wanniang Asst. Education Secretary KSU South West Khasi Hills District
