Shillong, Naitung 10: Kane ka jingjia kaba la wanrah ia ka jingeh kaba khraw ia ki paidbah nongshong shnong hapoh katei ka shnong haba phai ha ki ba bun kiliang katkum kane ka juk kaba mynta. Naduh ka 18 tarik jong u bnai Jymmang (May) 2018 nakaliang jong u Rangbah Shnong Bah Jeebon Kynter haba iohi ia kane ka jingjia hapoh ka shnong mar mar ula pyntip shapoh ka ophis treikam jong ka MeECL Mawsynram Sub-Divison kaba don hapoh ka shnong Mawsynram. Nakaliang jong ki nongtrei jong katei ka ophis kila pyntip ba kala don ka jingsniew noh u transformer hapoh katei ka shnong bad yn hap ban buh bujli noh da uwei pat.
Hadien ba la ap kumba katto katne sngi ym shym la iohi dak eiei ruh ba kan don ka jingshim khia napoh katei ophis bad kum u Rangbah Shnong u la pyntip ruh ia kane ka jingjia ha u Samla Banshai Marbaniang uba dei u nongtrei mon sngewbha jong katei ka thain ban iarap lem ha ka ban pynsngew ia kane ka jingjia shapoh ki bor kiba kham shalor jong katei ka ophis.
U Samla Banshai Marbaniang haba ioh ban iakren bad u Rangbah Shnong u la leit mar mar khlem da pynslem ban iakynduh ia u Bah K. N. War u ba dei u Chief Engineer jong ka tnad Distribution hapoh MeECL Lumjingshai ban pynsngew ha u ia katei ka jingjia hapoh kane ka shnong. Haba iakren bad u ne u ophisar jong katei ka tnad nakaliang jong u khlem da pynslem u la kyntu ia ki nongtrei ba kin leh kham kloi ban pynpoi ia u Transformer uba thymmai sha katei ka shnong khnang ba kan ym buh jingeh ia ki paidbah nongshong shnong. Pynban kaba sngewsih kalong ba haduh kat kine ki sngi kiba mynta haduh baphah ia kane ka khubor ruh ym shym la iohi ba kan don ka jingkitkhia nakaliang jong ka tnad treikam.
Haba iakren bad u Bah R. Kharkongor uba dei u SDO ba dei khmih hapoh Mawsynram Sub-Division u la pynpaw ba nakaliang jong ka ophis ka la pyntip sha ki bor kiba kham shalor ban leh ia kaba donkam baroh.
Mynne ka sngi nakaliang jong u Rangbah Shnong lem bad u Secretary kila wan sha Shillong da ka jingbthah jong u SDO Mawsynram Sub-Division ban iakynduh ia ki bor kiba halor ban pynsngew ia kane ka jingjia bad ki la pyntip lang ia u Samla Banshai ban synran lem iaki na ka bynta kane ka kam. Da ka jingwan ban synran lang na u Samla Banshai la iohlad ban iakynduh biang sa shisien mynne ka sngi ia u CE jong katei ka tnad Distribution da kaba aiti ryngkat da ka jingthoh ban pynsngew halor kane. Haba iakren nakaliang jong u CE u la pynpaw iaka jingsngew lyngngoh haba iohsngew ia kane ka jingjia halor ka jingbym pat poi u transformer sha katei ka shnong wat hadien ba la dep ban bthah.
U Samla Banshai u la pynsngew ha u ba kane baroh ka jia dei nakadaw ka jingleh klet bym suidniew jong ka Department bad ka jingbym shimkhia khamtam haba phai sha ki thain nongkyndong. U CE ula kubur ia kane bad u la pynpaw ruh ba un shimkhia hi noh da lade ia kane ka bynta ban bthah ia ki nongtrei jong u ban pynpoi noh kloi kloi ia u transformer. Nakaliang jong u Rangbah Shnong ula pynpaw ha u ba hapoh kane ka shnong khambun na ki nongshong shnong kidei kiba ju thain jingthain khamtam ha kipor mynmiet namar mynsngi ki ju leit trei sha ki lyngkha ki bri jong ki da kaba rep synsar, sla tyrpad bad kiwei kiwei.
Nakaliang jong u CE u la pynpaw ba shapoh ka thain Mawsynram ka jingeh kaba khraw kaba ka Department ka iakynduh namar dang dei tang ka Sub-Division kaba dei khmih naduh Lyngiong harum Mawphlang ter ter shaduh Maheshkola kaba hap hapoh Ranikor. U la pynpaw ba bunsien nakaliang jong u la ju phah ia ka jingthoh shapoh ka miej jong ki Director ban pynkha noh sa kawei ka Sub-Division hapoh Ranikor bad ban kyntiew ia ka Mawsynram Sub-Division sha ka kyrdan Division hynrei kane baroh ka la shu sahkut khlem da ioh ia ka jubab kaba shai.
U Samla Banshai u la pynpaw ha u ba lada ki paidbah kim siew tista ia ka bai light nakaliang jong ka department ka ju don ka jingbyrngem wat ban ot shisyndon ia ka light ne wat haduh hap ban siew ki fine kumta ter ter. Hynrei ka jingkylli kaba nakaliang jong u samla Banshai u la buh kalong ba haduh lano kane ka transformer kanpoi sha katei ka shnong bad sa katno bnai ki paidbah kin dang hap ban mad ia kane ka jingshong dum. U CE ula kular ba ha kane hi ka taiew yn pynbha noh iakatei ka kam khnang ba kan pynsuk ia kiba bun balang baroh.
U Samla Banshai u la kyntu jur ia kane ka tnad ba kan shimkhia mardor khnang ba kan nym wanrah jingeh ia ki paidbah jong katei ka thain bad u la pynpaw ruh ba kane ka jingjia kan pynbor ia ki paidbah ban dawa ia ki bor Sorkar ban shimkhia ha kaban kyntiew kyrdan ia ka Mawsynram Sub-Divisioh sha ka kyrdan Division khnang ba kham pynsuk ia kiba bun khamtam ia ki shnong kiba hap hapoh ka jingkhmih jingpeit jong katei ka tnad.
