Shillong, Nailar 29:Ka Confederation of Ri Bhoi People (CoRP) ka dap da ka jingsngewkhia ba jur ïa ka jingleh kuman ka sorkar MDA bad ka pynrem ïa kane ka sorkar ban ïalehkai ïa ka pisa u paidbah lyngba ka central scheme ba kam lah ban siew pisa ïa ki kam ba ki Dorbar Shnong ki la pyndep ban pyntrei kum ki “Construction of Solid and Liquid Waste Management” ne ki jaka theh ñiut ha ki shnong.
La ïathuh na ka liang ka ophis ka la phah ban pyndep ïa ka kam hapoh 45 sngi hynrei yn da la pyndep ïa ki kam naduh u bnai Rymphang, 2020 shwa ka khangdam ïa ka ri haduh mynta kim pat ïoh ïa ka pisa.
Halor kane u President jong ka CoRP bah Bandari Ryntathiang u la phone sha ka Deputy Commissioner, Ri Bhoi District kaba long ruh ka chairman jong ka District Water Sanitation Mission (DWSM), ka kong R M Kurbah ka la ïathuh ba ki khlem pyllait ïa ka pisa na ka jylla.
Na ka liang ka seng, ka kyntu ïa ka sorkar jylla ba ka dei ban shimkhia ïa kane ka kam bad ka khia ka shon jong u paidbah, bad lada ka sorkar ka leh mynthi ka seng ka lah ban pynlong ïa kiwei pat ki jingïakhih ba tyngeh. Kane ka long katkum kyrwoh khubor ba la phah da u General Secretary CoRP, bah Evanasar Shylla.
