Shillong, Risaw 27: Mynta ka sngi ka Garo Baptist Convention kala pynpaw ia ka jingsngewsih bad ka jingsngewdiaw namar ba ia ka ktien Garo ym shym la pyntup lang ha ka thup jong ki 38 tylli ki jaitktien ban pynlong ha ka khyrngit kaba phra ka Riti Synshar ka Ri India da ka tnad kam poh iing ka sorkar pdeng.
Ka GBC kala pynpaw ba ia ka ktien Garo la kren da ki 1.5 million ki briew ha kane ka thain shatei lam mih ngi jong ka Ri India bad khamtam eh ha ki san tylli ki District jong ka jylla Meghalaya, ha Meghalaya ia kane ka ktien la kren da ki 33% ki nongshong ka jylla .
Haba phai sha ka pule puthi la kdew da ka GBC ia la pule iakane ka ktien Garo haduh ka kyrdan Doktor, kane ka jingdawa ban pynrung ia ka ktien Garo ha ka khyrngit kaba phra jong ka riti synshar ka Ri India ka dei kaba la slem bha.
Kumta la kyntu ia ka sorkar pdeng bad sorkar jylla ban peit ba ka ktien Garo kan don ha ka thup jong ki 38 tylli ki jaitktien, kane ka long katkum ka kyrwoh kaba la phah da u Sundar A. Sangma President bad Rev. Janang R. Sangma General Secretary GBC, Tura.
