Shillong,Risaw 26: Ka Khasi Hills Autonomous District Council, hadien ba la ioh ka jingmynjur na u Lat ka jylla mynta kala thung noh ia ka delimitation kommittee ka ban peit bniah ban phiah ia ki katto katne ki constituency kiba hap hapoh u pud u sam jong ka council.
Ha shwa jong kane na ka liang jong ka Executive Committee kala ioh pdiang na kiba bun ki shnong ba ki kwah ban ia soh noh bad ki constituency kiba kham suk ha ka leit ka wan.
Haba ia kren bad u Deputy Chief Executive Member ka KHADC u Bah Pynshngain N Syiemu la iathuh ba ki shnong kiba la phah ia ka aplikeshon ba kwah ban don noh bad ki constituency ba marjan bad suk ha kaba iadei bad ki kam ki jam ki kynthup ia ka shong Mawpat kaba hap hapoh ka Mawlai Constituency nalor kiwei ki shnong kiba don hapoh West Khasi Hills District.
Halor kane na ka liang u bah Pynshngain u la iathuh ba ka EC ha ka 26 tarik u bnai Nailur mynta u snem kila phah sha ka tnad District Council Affairs ban ioh ka jingmynjur na u Lat ka jylla bad ha ka 20 tarik mynta u bnai Risaw kila ioh ia ka jingmynjur na u Lat ka jylla.
Kane ka jingthaw ia ka delimitation committee ka long ban pynbeit ryntih i aka jingbun paid bad ka jingrit paid ha ki constituency bapher bapher, khnang ba kan long kumjuh ia baroh u la ong.
Kine ki shnong kiba la kyrpad ia ka KHADC ban phiah ia ka Constituency ki don kumba 10 ne 15 tylli ki shnong bad halor kane ka jingthaw ia ka kommittee la thung ia u Dr. S Khar Syiemlieh uba dei u Retire Judge ba un khlieh ia kane ka kommittee bad la shanniah ha kane ka kommittee ban phah ia ka kaiphod kloi katba lah ha shwa ban shim ia ka rai, ong u bah Syiem.
U bah Pynshngain u la iathuh ba ka constituency kaba la heh bha ki nongthep vote kadei ka Mawlai Constituency bad kaba duna eh ki nongthep vote kadei ka Mawprem Laban Constituency.
