Shillong, Jylliew 19: Ka tnad District Council Affairs jong ka Sorkar Jylla mynta ka sngi ka 19 tarik u jylliew 2024 ka la thaw da ka committee ka ban khlieh da u bah Paul Lyngdoh kum u shongknor u ba dei ruh u Myntri jong ka tnad Social Welfare jong ka sorkar Jylla ban thaw ia ki kyndon ki ban trei kam habaroh kawei ka Jylla Meghalaya.
Kane kan long khamtam eh ki Scheduled area ki ba hap hapoh u pud usam jong ka Jaintia Hills Autonomous District Council bad ka Garo Hills Autonomous District Council ki bympat don satia ia ka Lineage Act kum ba don ka Khasi Hills Autonomous District Council ia ka la pynlong ain da ka Khasi Hills Autonomous District Social Coustom of Linage Act 1997.
Ha ka jingiakren bad ki nongthoh Khubor U Bah Paul Lyngdoh u la ong ba ka jingpynlong iakne ka jingialang ha kane ka sngi ka long ban ia kren halor ki kynrum kynram ki ba la mih na ka jingai Scheduled Tribe certificate, ka Clan certificate bad ka Tribe certificate.
U la ong ruh ba ka Garo Hills Autonomous District Council ka la don ha ka lynti ban pynkhreh ia ka draff jong ka Bill ka ba iadei bad ki Tribe Certificate kat ba ka Jaintia Hills Autonomous District Council kam pat shym la don kano kano ka jing pynkhreh ia ka draff jong kane ka Bill.
U bah Lyngdoh u la pyntip ruh ba ha kane ka Committee yn kynthup lang ruh ia ki nongmih khmat na ka Khasi, Jaintia bad Garo Hills Autonomous District Council, nap oh ka tnad Law bad kumjuhruh nap oh ka tnad District Council Affairs.
