Shillong, Iaiong 06: Ka Confederations of Meghalaya Social Organisations (CoMSO) ka lah leit ban ia shim bynta ha ka 1st North East People Conference 2019 ha Imphal, Manipur kaba lah long ha ki tarik 1-4-19 haduh 3-4-2019 ia kaba lah khot pynlong sa ki Sengbhalang bapher bapher jong ka Thain Shatei Lam Mihngi bad pynbit pynbiang da ka MANPAC, Manipur.
Ia ka kynhun jong ka CoMSO lah ialam da u Chairman Bah Robertjune Kharjahrin uba long u President Rangbah ka HYC ha ka jingdon ryngkat ki Nongialam jong ki seng bapher bapher kiba don hapoh ka kynhun jong ka COMSO.
Kane ka Conference kadei ruh ka lympung kaba nyngkong eh kaba ki sengbhalang bapher bapher jong ka Thain Shatei lam mihngi ban iakynduh lang ha kawei ka jaka na ka bynta ban ia thir bad ia mir jingmut halor ki jingeh bapher bapher kiba ki Trai ti trai trai muluk ki iakynduh na ka por sha ka Por.
Ha kine ki lai sngi ba lah pynlong ia kane ka Conference lah iathir bad iatai kumno ban wanrah ia ka jingiatylli hapdeng ki Sengbhalang jong ka Thain bad ruh ban pynpaw ia kawei ka sur kaba tylli lang mlon ha kino kino ki khep kiba ki nongshong shnong ka Thain ki ia kynduh jingeh.
Da kawei ka jingmut la rai ban thaw ia ka synjuk ki Sengbhalang ka Thain Shatei lam mihngi ia kaba la ai kyrteng ka North east Forum for Indigineous People (NEFIP). La jied Covener jong ka Core committee ia u Ningthouja Lancha na Manipur bad 3 ngut ki nongmihkhmat na kawei ka jylla kum ki dkhot kane ka Core Commiitee. Ia ki nongkitkam ba pura yn sa jied ha ka jingialang jong ka core Comiittee ka ban sa long shen ha Shillong.
Ha kane ka conference lah iarai ban pyrshah ia ka CAB, la rai ban pyrshah ia baroh ki polisi treikam ka sorkar India kiba ktah mationg ia ka thymmei ka bat khyndew bat Shyiap, ka hok kyrpang, ki riti dustur jong ki Trai ri Trai muluk ka dong ka thain bad kane ka synjuk kan kyrshan ia baroh ki sengbhalang ha ka Thain kiba dawa ia ka ILP System, NRC bad kiwei ki Ain iada jingrung kyrthep ki mynder ri hapoh ka jylla. La ong u Bah Roy Kupar Synrem Secretary ka CoMSO.
