Shillong, Jylliew 08: Mynta ka sngi ka 08/Jylliew 2026 u James KP.Sangma na ka party NPP u la thep kyrteng ban iakhun ia ka MP elekshon sha Rajya Sabha ha khmat u Returning Officer u Secretary ka iing dorbar thawain ka Meghalaya Legislative Assembly u Malthus Sangma, ha kaba la don lang u myntri ka sorkar jylla u bah Sanbor Shullai MLA ka UDP u bah Nujorki Sungoh.
Haba kren ha ki lat pathai khubor hadien ba la dep ban thep kyrteng u James u la ong ba u pynpaw ia ka jingsngewnguh ia ki paidbah ka jylla u myntri rangbah ka jylla u Dr. Conrad K.Sangma, ia baroh ar ngut ki symbut myntri rangbah ka jylla u bah Prestone Tynsong bad ia u bah Sniawbhalang Dhar bad ia ka kynhun MDA kaba ar baroh kawei kiba la ibit ban jied ia u ban long u kyrtong MP sha Rajya Sabha.
La ong ba mynta u dang shu dep ban thep ia ka kyrteng jong u ban iakhun ia kane ka elekshon bad u khmih lynti ba un sa shah jied kum u MP sha Rajya Sabha bad ha dien ka elekshon lada u la shah jied ban long MP un peit ia ki mat jingdawa kiba ka jylla kala dawa kiba dang sah teng mynta la slem bha.
La ong ba yn peit ia ki mat jingdonkam jong ka jylla ha ki por ki ban sa wan kiba ka jylla kan dang ia kynduh bad u la ong ba u kren ia ki bynta kiba ia dei bad ka jylla ha Rajya Sabha ban pynthikna ba ia ka sur jong ka jylla Meghalaya yn pynioh sngewbha ha Rajya Sabha.
Ha kane ka sngi la synran lang da myntri rangbah ka jylla u Dr. Conrad K. Sangma, ki myntri ka sorkar jylla ki MLA na ka kynhun MDA bad kiba ha iing ha snem kila poi lang ban sakhi lang ha kane ka sngi thep kyrteng ban iakhun ia ka MP sha Rajya Sabha.
