Shillong, Iaiong 02: U Dr Jemino Mawthoh kyrtong MP jong ka party UDP ha kaba la kyrshan lang da ki party kiba don lang ha ka sorkar Meghalaya Democratic Alliance (MDA) haba kren ha ka jingialap ilekshon mynta ka sngi ha Madon Polo u la ong ba ka party Congress kan nym ioh ban thaw sorkar ha Delhi, hynrei mano ban wan ym lah ban tip.
Haba kren ha kane ka jingialang paidbah, u la ong ba ka jingkam jong ka party Congress kaba ong ba ki seng riewlum kin nym lah ban leh ei ei ha Delhi, u Dr Jemino ha kane ka jingialang u la buh ka jingkylli hato ki MP kiba la jied na ka party Congress baroh shikatta ki la leh aiu u la buh jingkylli.
Ha kane ka jingialap ilekshon, u la pynkynmaw ia ka jingtrei jong u Prof GG Swell bam kwai ha dwar u blei u ba la shah jied kum u MP na ki seng riewlum, la ong ba u la lah ban leh bun ki kam, dei ka mati jong u tei u rangbah ba la ioh ia ka skul bah NEHU bad ka jingiada ia ka jinglong trai ia u dewiong ha kane ka jylla.
Ha kane ka sngi u la ong ba ka jylla ka dang don bun ki jingeh kum ka kam pud kam sam kaba ym lah ban pynbeit bad ka jylla Assam, ka jingkyrduh kam ki khun samla, ka rep ka riang, ki nongtrei sorkar bad kum juh ki nonghikai.
U la ong ba lada u shah jied kum u MP ha kane ka kynti kaba mynta, u la ong ba lada ka sorkar ha Delhi ka leh na ka bynta ka jingmyntoi ki riewlum kin pdiang bad lada ka long pyrshah ia ki riewlum kin pyrshah, ym dei ban sngap than ia ka Delhi.
Haba phai sha ka CAB, ka seng Congress kam shym la pyrshah ia kane ka bill, na ka liang jong u MP u khlem kren ei ei ha kaba ia dei bad ka jingpyrshah ia ka CAB. Haba phai sha ka sorkar MDA u la ong ba kane ka sorkar hapoh kane shisnem kala leh bun ki kam, lada ki paidbah ki jied ia u kum u MP un long ka jingkieng ia ka jylla bad ka Delhi, kum juh ki paidbah ka Garo Hills kin pynjop ia ka kyrtong jong ka NPP ka Agatha.
Kiwei ki nongialam na kiwei ki seng kiba la kren ha kane ka sngi ban ai ka jingkyrshan ia u kyrtong MP bala pynieng da ka MDA na ka seng UDP, ki long u Bah Lambor Malangniang MLA shimet, u Bah Ivanlumlang Marbaniang president ka PDF, u Bah KP Pangniang president ka HSPDP, u Bah Sniawbhalang Dhar nongialam ka NPP bad Myntri rangbah ka jylla u president jong ka NPP. Ha kane ka sngi la don lang ki MLA, ki MDC jong kine ki saw tylli ki party.
