Shillong, Rymphang 15: Mynta ka sngi ka kynhun kiba don bynta ban kyntiew ia ka kam jngohkai pyrthei sha ki thain Sohra hapoh ka jingialam u bah Alan West Kharkongor mynta ka sngi kila leit ban ai da ka jingthoh sha ka Deputy Commissioner jong ka East Khasi Hills District ba la sniew palat ka surok ban leit sha Nohkalikai bad Dainthlen.
Ha ka shithi kaba la soi da u bah Alan West Kharkongor sha ka DC jong ka East Khasi Hills District la thoh shai kdar ba ki ar tylli ki surok kiba dei ki jaka jngohkai pyrthei kiba paw sha Sohra, kum ka Dainthlen bad Nohkalikai kila sniew sha ba palat.
Na ka liang jong u bah Alan la long ba bun na ki surok sha katei ka thain la maramot na ka skhim PMGSY, katba ia ki surok kiba leit sha kitei ki ar tylli ki jaka leit kai la shuieh kumto haduh ba ka jingsniew ka surok long sha ba palat.
U bah Alan la ong ba kum u wei na ki riew rangbah ka thain ba ialeh ban kyntiew ia ki kam jngohkai pyrthei sha katei ka thain ha kaba ia dei bad ka jylla ha ki kam shangkai pyrthei ka sohra ka dei kum ka jaka shongkai jong ka jylla.
Haba ia dei bad ka surok ban pynbha na Umtyngar sha Sohra kaba la sdang ha u bnai Nohprah kala shusangeh kynsan na ka liang jong ki paidbah ka sorhra ki kwah ba ka sorkar ka dei ban sdang noh ia kane ka jingtrei na ka bynta ka jingmyntoi ki paidbah ka thain bad ki nongwan kai.
Kum ka kynhun kiba don ka jingsngewkhia ban kyntiew ia ki kam jngohkai pyrthei ha katei ka thain ki la ioh ia ka jingtrei shitom ha ka por ba dang long DC hapoh South West Khasi Hills District , ngeit skhem ba katei ka juh ka jingtrei kam kan long ruh mynta na ka bynta ka jingmyntoi ki paidbah katei ka thain.
