Shillong, Lber 29: U Bah Erwin K Syiem Sutnga,Advocate ba dei ruh u President Meghalaya People’s Labour Union (MPLU) mynta ka sngi u la phah ia ka shithi sha u myntri rang
bah ka jylla u Conrad K Sangma bad u symbut myntri rangbah ka jylla u Bah Prestone Tynsong, ha kaba u la ai jingmut sha ka sorkar kumno ban pynsuk ha kaba iarap ia ki nongbylla.
Ha ka shithi kaba la phah, u la ai ka jingiaroh ia ka sorkar kaba la shim bun ki lat ki lynti kumno ban ialeh pyrshah ia kane ka jingpang COVID-19, ha kaba ki paidbah ruh kila ai ka jingiatreilang bad ka jingbthah jong ka sorkar jylla bad mynta kala iaid san sngi ha kaba ki briew kila kohnguh ia kaei kaba ka sorkar ka pynbna.
Halor ka jingkloi jong ka sorkar ban ialeh ban weng ia ka jingeh jong ki riew kynthei, kiba niah kali kamai, ki ba trei kam barit baria, kiba bylla sngi bad dei ha ka jingialang ha ka 27th Lber 2020 ba ka sorkar kala buh ia u number 1070 ba ki paidbah kiba trei bylla ki lah ban phone sha utei u number ban pyntip.
Ban pynbha shuh shuh ia kaba la leh da ka sorkar na ka liang jong u President ka MPLU u la ai jingmut ruh sa shiphew tylli ki mat ban iarap ia ka sorkar ha kane ka jingialeh pyrshah ia u khniang jingpang COVID-19 ha ka jylla baroh kawei.
Ka sorkar kala pyntip lyngbat ka WhatsApp bad ka Facebook, hynrei kiba bun na ki nongbylla ki dei kiba trei ia ka kam misteri, Muster Roll, bad kiba trei hapoh jong ka MNREGS bad ka sorkar kala bthah ba kin phone sha une u number 1070, hynrei kane ka phone kaba shu bun kam ki paidbah kin ioh, halor kane la ai jingmut ban buh shuh sa 50 tylli ei ei ki number phone ban ioh ki nong bylla ban phone bad ia kane dei ban leh noh mardor.
Haba ia dei bad ka jingeh jong ki nongtrei par, ia kane ka bynta ruh ka sorkar ka hap ban peit ha kaba ka lah ban pyndon kam na ka District Mineral Fund ban iarap ia ki ha kane kum ka por ba don ka jingeh kaba ki ia kynduh.
Haba ia dei bad ka jingbuh ia ki kyndon ban iarap ia ki nongbylla ka sorkar kala dei ban kham pynjynsur ia ki kyndon ha kum kane ka por ba ki nongbylla ki ia kynduh jingeh na kane ka jingialeh ban ia da na u khniang jingpang COVID-19 na ka bynta ban pynioh ia ka jingiarap sha ki nongbylla dei ban pynduna ia ki kyndon.
Haba ia dei bad ki nongtrei muster roll hapoh jong ka tnad Horticulture bad kiwei kiwei ki tnad sorkar bun na ki kim pat ioh ia ka bai bylla jong ki bad ia kane la ioh jingtip na ka tnad rep soh jong ka jylla ba kim pat ioh ia ka bai bylla jong ki haduh bap hah ia kane ka shithi.
Haba ia dei bad kiba thiah pang ha ki Hospital, ban iarap ia ki ka sorkar kala dei ban pynheh ia ka bhah pisa na ka skhim MHIS bad ban pynsuk ia ka rukom siew pisa ban weng ia ka jingeh ba kiba thiah pang kin lait na ka jingsiew da ka pisa sha ki Hospital ha kane ka jingialeh pyrshah ia u khniang jingpang COVID-19.
La don kam ban wan rahlang ia ki rangbah shnong, dorbar shnong, ki Nokmas, ki Village Employment Council ha kawei ka shatrei ba kan don noh ka “Village Corona Defence party” ha ki shnong hapoh ka jingpeit jong ki BDO ba kin pyntreikam ia kane ka “Social Distancing” ba kin pynsngewthuh sha ki paidbah bad ha ka juh ka por ban pynpoi ia ki marbam, ki dawai sha ki nongshong shnong bad ba kin peitngor ruh ha ki shnong ki thaw. U President ka MPLU u la ong ba lada ym lah ban phikir ki shnong ki kam sniew kin sa mih.
Ha kun kane ka por kin don beit ki ban pynkhein ia ki kyndon, hynrei ka sorkar ka lah ban wanrah ia ka Ordinance hapoh ka kyndon 269/270/271 IPC ba ia kiba pynkhein ia ki kyndon dei ban sep phatok la kumno kumno lai snem khlem jamin.
Haba ia dei na ka bynta ki muktiar, kumba la ai jingmut da ka Bar Council ba dei ban ai jingiarap pisa ia kito ki muktiar kiba dang shu dang ia kane ka kam kiba dang san snem shapoh, la kyrpad ia u myntri rangbah ka jylla ba un shim khia ia kane ka bynta namar kine ruh ki shem jynjar ha kane ka por.
Ha ka juh ka por ka dei ban don ka jingiatreilang, ha pdeng ka sorkar pdeng, ka sorkar jylla bad ki District Administration ha kaba ia dei bad kio kino ki jingbthah kiba mih da kaba pynkylla ia ki ha ka ktien Khasi, Pnar, Garo bad Hindi.
U President ka MPLU u la kyrpad ia ka sorkar ba dei ban ai ia ki lad jingiada ia ki nongtrei kiba ia don bynta ha kane ka jingialeh pyrshah ia u COVID-19, kum ki Mask, ki Presonal Protection Equipments bad ka jingiada kaba kyrpang ia kito kiba la palat ia ka 70 snem shaneng, la ong u Bah Erwin K Syiem Sutnga ha ka shithi sha u Myntri rangbah ka jylla mynta ka sngi.
