Shillong. Lber 29: Ka Bobeeta Sharma jong ka All Indian Congress Committee ( AICC) hynne ka sngi haba kren ha ki nongthoh khubor ha ophis treikam jong ka Congress ha nongbah Shillong.
Kala ong ba ka parti Congress ka la thung ia ki katto katne ki nongialam jong ka parti ba kin kren haba iadei bad ka jing-shahmait kyrteng noh u nongialam ka seng congress u Rahul Gandhi kum u dkhot jong ka ïingdorbar thawaiñ Lok sabha.
ka Bobeeta Sharma ka ba la shah thung ha ka AICC ban kren haba iadei bad kane ka mat, ka la iathuh ba baroh la ia tip ia ka jing shah miat kyrteng u Rahul Gandhi kum u dkhot ïingdorbar thawaiñ Lok sabha.
la iohi ruh ia ki kam bad ki jingtrei shitom ki jong u Rahul Gandhi, ban kren ia kiba bun tylli ki mat ki jura kiba ktah ia u paidbah nong shong shnong jong ka Ri India ha ka jingim ba manla ka sngi ka jong ki, la ka dei ka jingkiew dor jong ki marbam mardih, ka kyrduh kam kyrduh jam, lada dei ka shongsuk shongshngaiñ jong ki kynthei.
La ong ba ka hok jong ki riewlum bad shibun kiwei pat kiba ktah ia u luk u lak ha ka ri baroh kawei, u Rahul Gandhi u dei ruh ka sur jong u paidbah ha ka ri baroh kawei. Ka la ong ruh ba u Rahul Gandhi, u la kren ruh ha parliament shaphang kawei na ki mat ba kongsan bha bad kata ka dei ka Adani Scam.
Kala kynnoh ba ka jingbamklop pisa da katei ka kompeni, hynrei katei ka kompeni ka la ioh ia ka jingiada na ka sorkar watla ka jing bamklop pisa ka long ka ba bun bha.
Kumta na ka liang jong ka Congress parti lem bad kiwei pat ki parti ha ka liang pyrshah ki la dawa ba kan don da ka jingtohkit ba kyrpang ka ban tip kum ka Joint Parliament Committee (JPC) ban peit bniah bad wad jingtip bniah halor kane ka mat hynrei, ym shem la ailad satia.
ka la ong ruh ba ka jing wanrah ia ka mukotduma ba naduh u snem 2019, ka long ban pynkylla noh ia ka jingiakren haba iadei bad ka mat bam klop pisa jong ka company Adani bad ka jingiadei jong u Myntri Rangbah duh jong ka ri bad u Gautam Adani.
Ka la ong ba ki ba bun ki kompeni kiba u Gautam Adani u la thied dei lyngba ka pisa kaba u la shimram da ki phew hajar klur tyngka na ki Bank, hynrei ban siew ia ka pisa pat u pan por kumba san snem, u Nirav modi, u Lalit Modi.
Hadien ba ki la dep ban shimram da ki phew hajar klur tyngka ki khlem siew shuh ia ka ram bad ki phet noh na ri India, ki dei ki nongthok, na kane ka daw ba u Rahul Gandhi u kren haba iadei bad kane ka mat khnang ba kan ym wan jia shuh kum ba jia mynshwa.
Ka la Pynshai shuh shuh ruh ba u Rahul Gandhi u khlem shem la kren ia kino kino ki kynhun jaitbynriew kiba shong ba sah hapoh ka ri india, hynrei u la kren beit tang ia kito ki nongtuh kiba la shim ram na ki bank bad khlem siew shuh ia ka ram ba ki la dep shim.
Halor kane ubah Charles Marngar MLA jong ka Congress na Mawhati constituency u la bynrap ia kane ka jingong bad u la ong ba ka Meghalaya Congress Committee ka pyrshah jur ia ka jingleh jong ka sorkar BJP, ha kaba u la ong ruh ba ka jing shahmait kyrteng jong u Rahul Gandhi ka dei ka jingleh donbor, balei tangba buh jingkylli ia ka jingbymlah jong ka sorkar ymlong shuh, kane ka long ba ka synshar paidbah ha ri India la pyngkhyllem khyllem noh.
U la ong ruh ba ka jingleh jong ka BJP ka dei hadien ba ki la iohi ia ka Bharat Jodo Yatra kaba la ioh jingkyrshan na kiba bun ki paidbah ha kylleng jong ki jylla jong ka ri India ka la pynsheptieng ia ka BJP.
Shuh shuh u la ong ruh ba ka jing shah mait kyrteng jong u Rahul Gandhi lehse kan jia long pymban kum ha ki por kiba mynshwa ba ka Indira Gandhi ka la shah mait kyrteng ha ki por ba mynshwa kum ka dkhot jong ka ïingdorbar Lok Sabha bad hadien ka elekshon ka la wan phai biang kum ka dkhot jong ka ïingdorbarthawaiñ Lok sabha bad ka la ioh long ka Myntri Rangbah duh jong ka ri india ha katei ki por.
